Rollei 35

星期日休息 : Rollei 35 後面嘅歷史

今日星期日休息好特別講相機,只不過講一部至今可能仍然係最細嘅一部 full frame 相機,唔計Minox 35 EL,最細嘅full frame機都仍然係菲林機,就係 Rollei 35 ,而 Rollei 35除咗係個樣仍然好經典(甚至機件配搭都係,你試吓 Sony 出部一樣咁細嘅機,枝蔡司鏡係唔係蔡司自己造),某程度上, Rollei 35 係一頁英國歷史,同一頁新加坡歷史。呢部機,見證新加坡艱辛獨立後嘅工業,亦係英女皇最喜歡嘅相機嚟。

Rollei 35 證明新加坡嘅工業實力

雖然 Rollei 係一間德國公司,但大部分 Rollei 35 都係新加坡勿洛區菜市甘榜嘅工業區製造,而現存好多 Rollei 35 ,包括新加坡製造嘅,都依然運作良好, Rollei 係1971年將 Rollei 35 生產線搬到新加坡,當時新加坡被馬來西亞驅逐咗六年左右,當時李光耀四處好似sales咁推廣投資新加坡,解決英軍撤出當地基地造成嘅就業問題,如果當時李光耀解決唔到就業問題,李光耀好快就應該會仆街。而當時李光耀引進咗兩間大公司過嚟新加坡設廠,一間係Seagate,到今日,Seagate主要生產基地都設喺新加坡,另一間就係 Rollei ,當時 Rollei 35係全世界最小巧嘅相機,機械結構嘅精細,到今時今日仍然係無出其右,當時德國Rollei敢賭自己嘅名譽上一個新生國家身上,都咪話唔藝高人膽大。

好多日本相機,到今日都唔知運唔運作到果陣, Rollei 35 仍然可以成為世界各地拍友嘅愛機,其實你可以睇到,新加坡嘅工業實力喺邊,當時點解新加坡會崛起,新加坡做到係唔單只人工平,而且工藝技術唔輸俾當時歐洲主要工業國家,呢個至係關鍵。正如香港崛起,其實係製衣,今日最靚嘅恤衫,仍然係要著香港製造嘅一樣。中國成日話自己世界工廠,我敢問,中國做唔做到一件工業產品,到咗四十幾年後,仍然耐用如昔,日本有能力、德國有能力、新加坡有能力,香港都有能力,但中國呢?1978年前仲有可能,近年嘅中國製工業產品,恐怕幾年後變垃圾,呢個正係解釋,一旦柬埔寨、緬甸、孟加拉呢啲國家進一步興起,我唔知中國工業能力仲有乜地方值錢。

Rollei 35 : 女皇陛下御用相機

眾所周知,我國女皇係好鍾意影相,經常攞住相機周街去,但女皇陛下攞住相機,仲要兩次被記者影到,應該係 Rollei 35 ,佢用果部金色版 Rollei 35,應該係德國製機型,係唔係新加坡製,可能遲少少用FOIA去問(應該好有趣一個題目),呢個亦係點解,好多人對呢部相機好有印象嘅原因,當然 Rollei 35 超級細部,細到手掌咁大,話雖佢係估焦相機,仍然可以有一席之地嘅原因。如果係新加坡製,應該可以更加係對當地新加坡嘅嘉奬,大家諗吓,點解好多英國公司,爭相喺自己嘅產品加上皇室徽號,同寫明係皇室指定供應商,因為英國皇室御用,本身就係品質嘅保證,呢個世界無其他皇室,比英國皇室更有牙力去推銷自己國家嘅產品,由marketing角度,英國人用公帑去養皇室,其實係超值。

當然,女皇依家用嘅相機,應該係數碼化咗,但大家要問一個問題,如果要出一個數碼版嘅 Rollei 35 ,有無可能?唔計 Rollei 公司已經破咗產,就算係Sony牽頭,蔡司肯貢獻鏡頭技術,今日嘅CMOS、CPU、RAM、電池等技術,可唔可以製造一部咁細嘅full frame相機。無錯,條街有好多傻瓜機,都好鬼細部,但呢啲傻瓜機,全部都唔係full frame,全部嘅感光元件都細到嚇死人,亦因為係咁,所以手機一出現,呢啲所謂細數碼相機即刻無晒市場,因為我唔要full frame,咁我點解唔用iPhone嚟做街拍?依家嘅數碼技術,係唔係真係登峰造極,我嘅答案,好明顯唔係,依家嘅數碼技術,仍然有十分之多嘅進步空間,至少喺影相呢個層面,唔少人仲會用菲林拍攝,唔係因為懷舊咁簡單,而係數碼仲有好多方面係有改進空間,單係縮細問題,呢個己經有待大家去努力,至少我依家,係唔會考慮買一部所謂輕便數碼相機,一係iPhone影,一係我要部菲林好過。

發表迴響

你的電子郵件位址並不會被公開。 必要欄位標記為 *