熱起來-min

對一帶一路 熱起來 ? 用共產語言用到咁上手

香港真係好黐線,其實本來呢三日公共假期,我想寫得軟性啲嘅嘢,只不過,啲膠政客要你離地都好有難度。好似林鄭月娥,叫年青人要對一帶一路 熱起來 ,我聽完真係即刻打咗個突,以為自己耳仔會生青苔咁滯。

熱起來 一定唔係香港語

我本身同時可以講流利香港語同華語,知道兩者語言差異, 熱起來 絕對係華語講法,仲要係共產黨宣傳術語嘅語法。因為香港語唔興講 熱起來 ,如果喺香港,你試吓講熱起嚟,一係你真係好熱,一係就會有人問你seed or mother。所以,林鄭月娥呢個講法,一係佢係照中共嘅稿背出嚟,一如梁振英嘅《施政報告》好多好明顯係華語語法,你話唔係中聯辦班仆街幫佢起稿都無人信,一係林鄭月娥自己洗到上晒腦,自己都用華語嚟思考,仲要係共產黨華語嚟思考,我自己細個識講華語,都唔會隨口講得出對一件事 熱起來 。南洋華人嘅華語係無對一件事 熱起來 嘅概念,台灣都應該無,所以呢個肯定係嚟自中國受共產黨污染嘅華語,至會有呢種修辭手法,而香港年青人,最討厭就係呢種共產中文,所以,你想叫年青人對一帶一路 熱起來 ,恐怕啲年青人會比較熱烈咁問候你林鄭月娥嘅娘親多一啲。

政客嘅語言修辭可以睇到思維方式,而林鄭月娥用得 熱起來 三個字,無論係佢幕後班底係中聯辦嘅仆街,定係佢自己洗腦洗到變咗共產黨官僚咁嘅款都好,大家都要有心理準備,林鄭月娥確係CY 2.0,甚至一如曾俊華所講係撕裂2.0,共產黨式嘅管治手法一定陸續有嚟,挑動人民矛盾,政策向中國傾斜,唔理香港人利益,沒有最左只有更左呢啲方針都會更清楚,所以點解白票黨被人問候祖宗十八代,就係好多人都係睇到呢樣嘢,係啲左膠日日喺度唔知真天真,定係扮天真,但今日林鄭月娥用咗 熱起來 三個字,表露出佢嘅本相出嚟,大家必須要留意得好清楚。

我對香港人嘅忠告係,林鄭月娥一定係百分百嘅傀儡,大家一定要拋棄幻想,準備鬥爭,呢個政府沒有最仆街,只有更仆街,如果有一日曾俊華由lesser evil,突然間迫到要變民主領袖,唔係佢想,而係林鄭月娥幕後老闆太仆街。

One thought on “對一帶一路 熱起來 ? 用共產語言用到咁上手

發表迴響

你的電子郵件位址並不會被公開。 必要欄位標記為 *