何君堯

何君堯 示範性傾向歧視立法嘅迫切性

性傾向歧視立法本來有唔少爭議之處,只不過,近年越嚟越多人贊同,除咗因為社會上對LGBT權利嘅確認外,有部分人借宗教之名,公開抹黑不同性傾向人士嘅做法,亦實在太過火。 何君堯 親自用佢把口,示範點解有必要性傾向歧視立法。

何君堯 係公開抹黑加煽動仇恨

依家嘅hate crime,一般嚟講,都有一個好重要嘅元素,就係中傷,嚴重嘅嘲諷甚至挑動仇恨,都係依家反歧視罪行裡面針對。而性傾向問題上,係見得最多呢類罪行,而將LGBT平權用滑坡理論講到會人獸交,呢種情況正正係最離譜。你唔鍾意同性戀唔緊要,但將同性戀同人獸交相提並論,呢啲唔係挑動仇恨,或者強烈嘲諷,我唔知呢啲係乜嚟,而 何君堯 嘅言論,亦唔涉及所謂宗教問題,《聖經》邊章邊節講,同性戀係等同人獸交?我未見過呢啲章節,除非有人係讀偽經。

好多好似 何君堯 、梁美芬或明光社呢啲人,都係打住宗教旗號,反對性傾向歧視立法,對南洋人嚟講,係天方夜譚,有部分回教清真寺公然煽動仇視猶太人,唔通大家認為呢啲言論又係宗教自由,喺香港已經係《種族歧視條例》下嘅種族中傷,喺南洋,全部一早用《內部安全法》一類反恐法令拉晒人,因為呢啲仇視言論,好多時都搞出相關連嘅暴力或恐怖主義罪行,呢個亦係點解西方都會就歧視言論列為刑事罪行嘅原因,呢類言論往往係同宣揚暴力無異,為咗阻止暴力蔓延,係有必要採取行動。如果 何君堯 、梁美芬或者明光社,係用宗教自由為名,可以任由性傾向歧視言論散播,咁不如咁呀,都係以宗教為名,俾主張喺中國建立DAESH國家嘅激進恐怖言論任何法律上嘅免死金牌,咁又得唔得?性傾向歧視立法,針對中傷嘅罪行,就係要阻止 何君堯 一類嘅亂噏廿四嘅言論蔓延,都唔係平唔平權嘅問題咁簡單。

如果唔想公眾加速性傾向歧視立法,最好 何君堯 有自知之明,收吓把口,佢依家唔係喺法院自拍呢啲輕微罪行,如果係挑動仇恨,日後如果大家係認真做嘢嘅話,係監都有得坐,公眾對呢啲已經無理取鬧嘅滑坡論容忍程度十分之有限。

發表迴響

你的電子郵件位址並不會被公開。 必要欄位標記為 *