房屋局長-丁蟹-min

膠觀點:由 鄭少秋 做房屋局局長

陳美玲做教育局局長單嘢,雖然係膠,只不過,喺香港樓市荒謬如此,束手無策之際,由陳美玲嘅傳聞得到啟發,不如將 房屋局 獨立拆出嚟,然後禮聘 鄭少秋 擔任房屋局局長。 鄭少秋 識唔識做局長,呢個係唔重要,因為大家都係想借丁蟹效應一用,如果 鄭少秋 做房屋局局長嘅話,我相信林鄭月娥政府嘅民望,一定好似《大時代》劇情咁高潮迭起。

丁蟹效應 隊冧樓市

大家都知道,香港係一個磁場好奇怪嘅地方,專門出埋啲常理都解釋唔到嘅效應,例如燒山效應,令蕭若元嘅任何分析都係神諭嚟,燈力影響地球。同樣, 鄭少秋 只要出現喺電視機,股市往往有反應,喺CLSA仲係一間法蘭西行嘅年代,已經有研究顯示丁蟹效應嘅威力,任何股民見到丁蟹嘅劇集要上,都已經知道要準備沽定期指搵真銀,因為 鄭少秋 代表嘅丁蟹氣場,呢個係唔可以挑戰,一如蕭若元嘅燈力,係連當事人自己都解釋唔到。

既然依家政府對樓市束手無策,大量中國走資嚟香港炒完又炒,新高完又新高,既然係咁,陳美玲都可以做教育局局長,咁 鄭少秋 點解唔可以做房屋局局長,當 鄭少秋 做房屋局局長,大家對樓市暴跌有心理預期,唔駛出八萬五,都自然樓市暴跌,特別以中國人咁迷信,啲中國黑錢一定雞咁腳咁走,屆時租金同樓市大跌,香港人有錢買樓,林鄭月娥嘅民望仲唔會暴升?對於 鄭少秋 呢類藝人,局長嘅人工又唔錯,跟住退任之前,就俾番個非官守太平紳士,加金紫荊星章之類嘅虛銜,我可以講,呢招簡直係拯救林鄭月娥呢個地獄熱廚房嘅絕橋。

當然,就算丁蟹效應起唔到作用,都未必係問題嚟,因為如果 鄭少秋 未有一如預期,將樓市隊冧,投資者都可以放心,原來丁蟹效應係唔存在嘅,咁就可以令香港股市更暢旺,咁林鄭月娥下一步就係要禮聘蕭若元擔任局長,充分運用蕭若元嘅燈神效應,例如蕭若元做房屋局局長唱好樓市,日日喺政府新聞網叫大家買樓,跟住樓市係咁跌,林鄭月娥嘅民望就會節節上升,如果無呢個效果,燒山當然亦樂意擺脫燈神之名,何樂而不為?所以,林鄭月娥應該快啲聯絡一下 鄭少秋 ,再搵蕭若元做後備,應該隊冧樓市可期。

發表迴響

你的電子郵件位址並不會被公開。 必要欄位標記為 *