陳捷貴-min

警方應即拘捕 陳捷貴

雖然泛民議員與親共議員同官員開會果陣會有肢體衝突,但好少會涉及真係common assualt甚至ABH嘅情況,泛民有幾和理非非,大家係有目共睹。只不過,呢次 陳捷貴 (大學選區區議員,土共)襲擊許智峰(中區選區區議員,民主黨),就完全唔可以接受。

乜扶起人要箍頸嘅咩?

我唔講政治,我講刑事法律。如果 陳捷貴 係一如佢個人嘅辯解,真係要扶起許智峰,係無理由要郁到佢頸部,呢個由常識嚟睇,根本係一派胡言嚟。如果 陳捷貴 要扶,合理嘅情況,都係扶起手臂,再加上之前 陳捷貴 與許智峰有言語衝撞在先,所以有合理懷疑佢有Mens Rea去攻擊 許智峰 ,呢個有乜奇至得。所以,依家好明顯,有合理懷疑 陳捷貴 干犯至少係common assault(普通襲擊罪)嘅罪行,至於係唔係ABH,就需要去驗傷,但如果ABH都中, 陳捷貴 應該唔駛再做議員落去,因為ABH係好難判得輕,如果佢只係common assault,社會服務令、罰款同守行為呢啲都唔駛甩。

警方一向處理土共同梁振英嘅襲擊報案十分之快,我期望警方用同樣處理,處理 陳捷貴 襲擊許智峰嘅案件,如果明天警方未有拘捕 陳捷貴 ,或者預約拘捕 陳捷貴 嘅話,我建議大家集體報警,並且要求警方立即根據《警察通例》留低報案簿編號(Report No.,俗稱RN Number),呢單案係一單普通襲擊案件,係十分之清楚。 陳捷貴 並唔係朱經緯,我相信警方並唔需要拖夠八百幾日,搞到受害人出動私人刑事傳票檢控,警方知道自己嘅面子撐唔住,至侷住要預約拘捕朱經緯,如果再搞到好似朱經緯案咁至拘捕 陳捷貴 ,不單公眾會進一步唔信警察,我相信警察再有涉及刑事罪行,果啲休班警、當更警、退休警、輔警犯罪龍虎榜嘅玩法會越嚟越盛行,屆時做差人就真係邊度都唔駛去。

如果呢次 陳捷貴 襲擊議員都唔駛被拉,我覺得警方拘捕任何涉及肢體衝突嘅警員都無道理,我建議泛民嘅議員認真練武強身,咁搞法,香港一定搞到好似以前台灣嘅立法院咁,搞到好似世界摔角大聯盟嘅比賽咁都似。

發表迴響

你的電子郵件位址並不會被公開。 必要欄位標記為 *