陳肇始-min

陳肇始 未坐正都已經趕住周圍管

雖然無乜人想入林鄭月娥呢個地獄廚房,但有一個局嘅局長人選,其實大家知係乜水做,呢個局就係食物及衛生局,高永文醫生決定唔再癲,做番大國手,而 陳肇始 呢個副局長,就好似已經坐正咁,係咁推啲新政策,係咁點火頭,慌死全世界唔知佢即將做局長咁。好似禁止向十八歲以下人士賣酒,以至煙包果啲唔知過唔過到淫審嘅核突警告,甚至急症室加價,都係 陳肇始 趕住出嚟推。

陳肇始 乜都管遲早引火自焚

講真,高永文醫生任何真係講唔出有乜表現,但點解佢叫高民望,因為除咗中國人搶香港人醫療資源呢個問題無管,佢只係做咗限奶令咁多,仲要限奶令係我諗出嚟,具體條文係林忌嘅版本嚟,基本上乜都唔駛做就可以有民望。無錯,高永文係hea做,但喺梁振英年代,hea做可能對香港最有益,唔通學吳克儉條barcode頭,好勤力咁做啲仆街嘢咩。所以,高永文選擇呢個時候落台,其實某程度上,佢都仲有作為一個醫生應有嘅觀察力同判斷力,見到情況太膠不如做番大國手搵真銀好過。

但 陳肇始 好明顯係一個急於顯示自己幾做得嘢,幾打得嘅人,好似核突煙包,過唔過到淫審都唔知。跟住急症室一百八十蚊,大佬,你有無睇中國人點霸佔私家醫院先,不如禁止嚟香港搞medical tourism嘅中國遊客入境香港好過。然後話唔俾賣酒俾十八歲以下人士,其實我唔知有乜依據,我夠十二歲飲啤酒,酗酒,某程度上係社會問題多於禁止十八歲人士買酒可以管嘅事。隨時因為十八歲呢條界,引起更多細路想買酒。如果 陳肇始 咁有心,點解唔推出法律,禁止有酒後駕駛紀錄人士買酒,咁樣又係唔係更符合公眾利益,雖然我睇呢項措施,同禁止十八歲以下人士買酒一樣,根本係執行唔到嘅法律嚟。

陳肇始 係一個好有潛質嘅計時炸彈嚟,因為佢條友太多嘢想推,未經深思熟慮就衝出去推,呢啲行為,其實同衝出嚟柒係無分別,所以大家可以買定花生,如果林鄭月娥真係搵呢條友做局長,大家有乜花生可以食。政壇有傳林鄭月娥想挽留高永文,查實又唔係空穴來風,因為有啲人太勤力,係勤力到引嚟膠味。

發表迴響

你的電子郵件位址並不會被公開。 必要欄位標記為 *