防火電線-min

防火電線 有問題,定係成個建築行業有問題

傳真社發現 防火電線 唔達標呢單嘢,其實好得人驚,但無人追,究竟當中涉案嘅建築商,有無重覆又重覆咁,用埋啲牙煙物料,令大家買樓或租樓果陣有所防範。所以,我對清單餘下未分析嘅樓盤,再進行一次挖料分析,等大家知道,呢啲建築商,有幾多係重覆又重覆,用埋晒啲牙煙嘅 防火電線 ,令消防系統好可能會出現問題。

用有問題 防火電線 建築商清單

以下嘅表,係除咗較早前嘅文章有列出果啲,餘下會住人或主要辦公地盤裡面,用咗有問題 防火電線 果啲建築物嘅承建商清單。

項目 承建商
寶鄉邨 協興建築
欣田邨 金門建築
洪福邨 新昌
安達邨D 新昌
安達邨E 有利建築
朗善邨 新昌
丰匯 精進建築(興聯)
昇柏山 俊和
溱岸 協興建築
青洲街海關宿舍 中國建築
港大百周年校園 金門建築
添馬艦政總 協興建築/金門建築

大家發現到一個好有趣嘅現象,首先,中國資本嘅建築商,幾乎肯定係出事,包括新昌同埋中國建築,兩間都明顯係中資。而地產商擁有嘅建築公司之中,唯一出事嘅,係由新創建擁有嘅協興建築,寶鄉、溱岸、政總都係出晒事。而英資建築公司,都唔代表一定可靠,政總、港大百周年校園同埋欣田邨出事,係金門建築。換言之,依家未發現有出事,反而係新地同埋恆基自己全資擁有嘅建築公司,呢個可能因為發展商同時擁有建築商嘅話,有乜事無得賴,必須負全責,所以唔計溱岸,其餘由發展商自己做埋建築商嘅盤,都好少用到有問題嘅 防火電線 ,或者捲入鉛水醜聞呢啲膠事上面。某程度上,呢個都將會係一個投資地產果陣必須要考慮嘅因素,畢竟呢個係同住客條命有關,亦最終會影響到樓宇嘅租值,以及喺二手市場嘅生存能力。如果啲電線唔及格,日後消防處或屋宇署下令要換,啲錢唔通你認為地產商會孭?咪玩喇,最後又咪係小業主硬食咗條數,喺依家唔公平嘅建築物管理法律之下。

所以我睇, 防火電線 有問題,遍及咁多建築商,又涉及政總呢啲一等重要嘅政府建築物,反映出依家香港係成個建築行業好可能都有問題,至少喺供應鏈呢一方面係有問題嘅,香港人嘅畢生儲蓄,好可能到頭來只不過係一場賭博。

發表迴響

你的電子郵件位址並不會被公開。 必要欄位標記為 *