英國狗-min

喺球場用 英國狗 鬧英國人,中國球迷五行欠咗一樣嘢

廣州恆大啲憤青喺球場以為響應黨嘅號召,出banner鬧人 英國狗 ,但呢件事好明顯會令中國搞出一鑊泡出嚟,除咗東方已經向亞洲足協投訴之外,英國報紙,仲要係一向都頗為排外嘅 Daily Express 都報導出嚟。我唔知依家廣州恆大班友,知唔知自己係十分之大鑊,不單令廣州恆大隨時遭到罰款,而且呢啲事搞多兩搞,仲會令中國嘅球隊,日後引來更多嘅麻煩。

英國球迷一向以牙還牙

歐洲有幾個以球迷暴力聞名嘅民族,除咗眾所周知嘅戰鬥民族俄羅斯,仲有荷蘭,同埋英格蘭,英格蘭係有球迷騷亂嘅傳統,睇波睇到講手係家常便飯,而且球迷十分之記仇,荷英大戰嘅主場城市,警察係必須嚴陣以待,因為兩邊球迷唔係人咁品,英俄大戰,荷俄大戰,都唔好得好多,全部都係黐孖筋。當然,英俄,荷俄、英荷之間嘅大戰,全部都涉及呢啲國家過往嘅恩怨情仇。2016年6月英格蘭同俄羅斯球迷至喺法國大打出手,戰鬥民族連刀都出埋,你話得罪英格蘭球迷有乜著數至得。

本來英中兩國球迷一啲交集都無,因為中國嘅足球水準,實在係太屎,英中大戰,隨時中國隊要慘吞十幾隻蛋收場,你話有乜為呢。只不過,呢個banner出咗之後,咁樣侮辱英國人,加上香港係前英國殖民地,以及DQ游蕙禎、梁頌恆呢啲離譜事件,英國傳媒,連左膠到爆嘅《衛報》都主動而且大篇幅報導,你覺得英國球迷日後如果遇上中國球迷,會點樣。特別有唔少憤青五毛,實會主動挑機,屆時我真係留名食花生,睇成班英格蘭球迷同中國球迷開片。基本上,除非中國球迷覺得自己有俄國同荷蘭,或者法國嘅勇武,否則我睇一堆中國球迷入廠,都係一件好好笑嘅事嚟。

所以喺球場中國球迷咁樣挑英國人機,不單亞洲足協會做嘢(得罪歐洲國家你估好好玩乎?),香港平機會有可能做嘢,更大問題係,你依家係得罪咗一班,本來無乜興趣挑你班友機嘅英國球迷,而英國球迷果種「勇武」,英國人自己都知可以有幾大鑊,所以我話,呢班中國球迷五行欠咗一樣嘢,而果樣嘢,就叫做「丙」,甲乙丙丁戊果個丙。

發表迴響

你的電子郵件位址並不會被公開。 必要欄位標記為 *