牛角-抽水marketing-min

牛角 嘅抽水marketing

一直以嚟我都話,周星馳越嚟越難拍戲,因為現實世界果啲膠事,比周星馳,甚至法國笑片更加黐線,例如 牛角 AA制男女毆鬥事件。情節唔單只羅生門,我相信連 go Dutch 聞名嘅荷蘭佬(雖然本來going Dutch,或者dutch treat都係英國佬喺英荷戰爭期間潤荷蘭佬用),都會覺得件事好膠。為免跟車太貼,我暫時唔評論案情先。但 牛角 嘅抽水marketing手法,確係值得一讚。

日系公司比較肯搞抽水marketing

平心而論,如果出入過日本,食過日本本土嘅 牛角 ,就覺得香港 牛角 味道並唔特別出眾,而且價格偏貴,因為日本本土嘅 牛角 呢類連鎖式燒肉店,一般都係食幾千円乜都飽,你講緊一對男女食咗三萬円嘅 牛角 燒肉,仲要因AA制大打出手,唔怪得 牛角 香港嘅特許經營商去日本開會,都會睇完案情笑咗,唔單只案情好膠,係連個金額都好膠,日本人知道呢單咁嘅奇案,一定以為香港無燒肉食,所以至會搞成咁。

不過日系公司有樣好,敢抽時事水,好似之前麒麟啤酒,喺葉劉淑儀喺年初二被麒麟撞之後,立即抽到葉劉淑儀變人乾,當然希師奶係十分之乞人憎,所以抽水抽到乾都得。而 牛角 係好有觸覺,夠膽出呢個二人餐,大家記住,依家係接近淡季時間,正所謂五窮六絕,所以識抽水喺淡季好重要,我係 牛角 實要多謝呢pair膠人,雖然應該有少少損失,只不過膠人可以膠出一個marketing嘅機會,係我都幾大唔好錯過,分分鐘抽一吓水啲sales都返晒嚟,乜都補番晒有突。

其實依家做marketing,最怕我討厭政治,我討厭膠事,因為消費者唔係咁睇,好似呢類港男港女糾紛,一向都係熱門討論話題,你喺熱門討論話題搵到錢,特別霸佔SEO同newsfeed嘅位置係好重要,抽一次水好過學某啲好似阿石咁嘅柒頭,走去收人千幾銀教人落facebook廣告。做marketing,了解政治,了解社會,係基本修為,因為marketing本來同社會學、人類學直接相關。我真係唔明點解啲家長,以為讀BA可以識做生意。其實如果呢個世代,講實用,social science有時實用一百倍。(當然學左膠讀死書,讀乜科都係膠人一個,唔會有得救。)

發表迴響

你的電子郵件位址並不會被公開。 必要欄位標記為 *