導火新聞線-min

導火新聞綫 壹號皇庭 妙手仁心

導火新聞綫 播出之後,除咗瑪嘉烈與大衛之綠豆,好少港劇值得細緻討論。只不過,大家將 導火新聞綫 擺番喺成個香港電視史嘅時空,其實潘漫紅做咗一件好成功嘅事,就係成功令港劇掌握到專業類型劇種嘅拍法。HKTV無以為繼都好,如果ViuTv以外判形式,俾潘漫紅團隊玩落去,查實係有得做。

導火新聞綫 成功在於乜

首先,我列出香港經典專業劇種,以及對應嘅美劇

港劇 美劇
導火新聞綫 (HKTV) The Newsroom (HBO)
壹號皇庭 (TVB) Law & Order (NBC)
妙手仁手 (TVB) ER (NBC)

大家比較一下,TVB果啲,其實全部係fail,因為無辦法擺脫TVB工廠嘅標準formula,必須過量加入愛情線,而專業劇種好睇唔係愛情,要拍愛情唔該學Friends咁拍好過喇,而係專業工作果陣張力,好似ER,有budget、社會問題、醫生個人性格同急症室工作本質嘅衝突(Dr. Mark Greene尤其明顯),而Law & Order,係執法人員同檢控之間嘅衝突。如果香港仲喺英治年代,仲拍到嘅,不過依家中國管治年代就拍唔到。TVB鄧特希嘅劇集,包裝一流,但除咗壹號皇庭頭三輯,其餘都無空間發揮專業工作嘅人性衝突,所以就係無料到,咪係咁解。

The Newsroom 其實係失敗,因為無辦法將新聞專業工作張力展現出嚟,電視台有時未必夠報館火爆,當然香港果種賣紙文化,又係好得人驚,美國無英國嘅小報環境,但香港有。所以 導火新聞綫 好成功,甚至如果將劇本變成英文嘅話,改喺英國果啲小報做背景,一樣可以好好睇,甚至更爆,因為英國小報為賣紙果種不擇手段,更加無人性,將Phone hacking果單嘢改一改,夠拍足五至十集,拍到老總坐監為止都仲得。

當然,有專業同人性衝突問題,唔只記者、唔只急症室醫生、唔只律師,甚至會計師,都可以拍得出嚟,其實終根究底,係電視台老闆有幾敢言,為收視率開放尺度。TVB狂加愛情線嘅味精,因為好可能一早己經唔敢討論醫管局同警方內部種種流弊,根本拍唔出嚟。

發表迴響

你的電子郵件位址並不會被公開。 必要欄位標記為 *