Beyond-打不死-min

Beyond 打不死 :最早反對和理非主義嘅歌

Beyond 嘅《海闊天空》,大家都知道,喺我提倡下,搞搞吓變咗社運歌曲,跟住成棚熱普城好明顯收咗柯打去玩反對(熱普城唔係港獨,大家記住),但 Beyond 係唔係大家諗咁「和理非」。無錯, Beyond 無 LMF 吓吓爆粗問候娘親。但以政治意識嚟講, Beyond 同黃貫中有幾首歌,意識形態上係仲激進。而我呢個系列先介紹,係1998年作為《轟天炮4》中文版主題曲用嘅《打不死》。

Beyond 一早批死等運到無用

Beyond 係一個了解中國,但因太了解而直接唔接受「回歸」嘅樂隊(呢個同獨派好多係中國問題專家情況好似),1995年 Sound 大碟已經有首好激進嘅歌曲,就係《困獸鬥》,呢首歌嘅港獨程度,已經去到台灣閃靈嘅尺度

要講《打不死》,要由1997年驚喜大碟裡面講香港主權移交嘅《回家》講起,呢幾句,係用一個質疑嘅態度,去質問民主回歸派嘅理論

多少的不改始終也沒法改
你共我在一刻轉身經數十載
好風光 只可惜不再

請你面對好嗎 別要掩蓋這傷疤
從今我便會跟你 但你不要停步

這是誰的路 難為你討好

今天帶著問號 投入你懷抱
你暫停指導 同步已很好 

怎麼盼望運數 沉默當祈禱
好風光亦易老 漸變粗糙

簡單嚟講,如果中國真係做到民主回歸派講嘅,進步就好好。但黃貫中主導嘅 Beyond ,果陣已經唔信中國唔指指正正,中國會進步起嚟。果然,中國二十年後,依然係一個仆街國家。其實1998年,董建華搞八萬五搞出屎出嚟果陣,都知唔得,而《打不死》正係呢個背景之下出現,依家睇番,Action呢隻EP,叫得Action,係承上接下,而香港歷史上,第一首叫大家考慮勇武行動去回應社會局面,就係《打不死》,《打不死》嘅歌詞唔複雜

走想不想再回頭 不去接手也不會擁有
好風光不會停留 不要妄想老天會打救

誰人要守 誰人要走 誰人要抖

不偏不激不反 然而無力救你
不枯不萎不倒 仍然全賴勇氣
不屈不朽不囂 昂然重拾武器
不可不知不懂 隨時隨地你要 打不死

打不死 打不死 打不死

手總不可放在後  偏有對手要跟你爭鬥
等烏托邦再復舊  掙扎到底你終點會得救

《打不死》呢首歌,其實正正講咗勇武抗爭嘅合理性,你不偏不激不反,邊個救你?你唔想鬥,總有仆街想同你鬥。但好多人只係睇不偏不激不反,無睇到不屈不朽不囂,喺呢個情況下重拾武器,最難。所以講對社會嘅前瞻性, Beyond 走前成個社會十年甚至廿年,你估好似一啲喺廿年前仲係國民黨員嘅政棍,依家仲想扮獨派。

我提《海闊天空》、《抗戰二十年》做社運歌曲,其實好溫和,我聽嘅 Beyond ,係一個外表保守,實際激進到爆嘅樂隊。黃貫中自成一格後,依舊激進,下禮拜日我講《紅黑紅紅黑》同《新秩序》呢兩首。

發表迴響

你的電子郵件位址並不會被公開。 必要欄位標記為 *