葉繼歡-RIP-min

星期日休息 : 葉繼歡 有乜好RIP?

呢個禮拜,最值得深思,但最黐線嘅新聞,應該講係有唔少網民同 葉繼歡 RIP,隨之而嚟嘅爭論,就係一大堆邏輯但事實認定嘅混亂,一個 葉繼歡 ,將香港當前嘅膠事一次過暴露晒出嚟,所以我要留到星期日休息,篇幅相對比其他平日嘅blog文嚟得長,我至慢慢攞出嚟分析,呢件事,實在太膠。

葉繼歡 係 葉繼歡,葉國歡係葉國歡

葉繼歡 之所以成為網民 RIP 對象,其實好受《樹大招風》影響,《樹大招風》裡面以 葉繼歡 做原型嘅角色葉國歡,某程度上反映咗香港人果種時不予我,所以大家突然間好似好同情佢。我只能講,葉國歡係歐文傑創造出嚟嘅人物,佢無錯係反映咗一個時代,但歷史裡面果個 葉繼歡 ,只不過係一個持槍犯人,只不過佢比其他持槍犯人狼死一啲,打劫金鋪用到AK47,同美國、俄國呢啲戰鬥型國家睇齊,但如果因為葉國歡,而走去同情現實歷史果個 葉繼歡 ,成件事就太硬膠。所以,大家將戲劇同現實搞清楚先,唔好又犯大家當咗《三國演義》係正史嘅錯誤,《三國演義》唔少描述同情節,其實係同陳壽寫嘅《三國志》不符,羅貫中作為說書人,會因應戲劇需要而改變咗歷史人物的性格,呢個係我們看待小說或電影要特別注意,特別係歷史小說或電影,就更加要小心謹慎,唔好搞到亂晒大籠。

至於話 葉繼歡 殺黑警,所以係英雄,呢句嘢簡直係黐線, 葉繼歡 唔係依家犯案,佢食大茶飯嘅年代,係皇家香港警察嘅年代,果個年代嘅警察,係香港警察史上最得民心嘅一期,如果有警員因 葉繼歡 而殉職,呢個係絕對不義,發音之前連timeline都搞唔清楚,呢個亦係好多人鬧爆啲網民嘅原因。當然,大家對黑警嘅憎恨係失去咗理性,你憎今日嘅香港警察係一回事,但 葉繼歡 對當年嘅皇家香港警察,甚至今日嘅香港警察用AK47,都唔見得佢係正義,因為佢只不過係純粹老笠嘅一個大賊,佢唔係徐步高。 葉繼歡 或者唔做大賊,可能可以做一個稱職嘅漫畫家,佢有呢個天份,如果佢呢方面嘅天份,趕得及香港漫畫嘅黃金時代, 葉繼歡 或者可以做獄中漫畫家,但唔會係應該因對付警察受人崇敬。徐步高係一個複雜好多嘅人,佢相關嘅材料話俾大家聽,佢注定係一個極為複雜嘅人,相信唔係一般小說或戲劇可以處理嘅人物,我諗我資料唔夠果陣,亦唔打算對徐步高呢個人作進一步評論。但徐步高嘅印尼華人背景,以及又做過華籍英兵,令呢個人大家要評論佢果陣,要考慮好多複雜嘅文化同人類學因素。但 葉繼歡 ,無呢啲因素存在。

但如果話 葉繼歡 涉及用AK47槍殺市民,而令佢係十惡不赦,呢個亦係唔公道,由翁靜晶律師搵嘅史料,特別負責調查當年案件警員提供嘅史料,以及法庭嘅檢控紀錄, 葉繼歡 唔係犯殺人罪,如果佢係謀殺,就應該被判終身監禁,但最後 葉繼歡 係因以下罪名被判監禁:

  1. 逃離合法羈押
  2. 無牌管有槍械及彈藥
  3. 使用槍械及彈藥意圖抗拒合法逮捕
  4. 意圖危害生命或財產而管有爆炸品罪名成立

香港始終係一個行無罪推定嘅地方,1993年中流彈而死嘅懷孕女護士,究竟果槍邊個開,同埋可唔可以用joint enterprise嘅原則,去入埋 葉繼歡 數,呢個應該重開死因庭去判定,而唔係大家依家 葉繼歡 人死咗,大家就一口咬定係佢做。講真,徐步高死後,可唔可以用佢合法被殺同死因庭研訊結果,去裁定徐步高家屬唔可以享有退休金或撫卹金,呢個都係有可以爭辯嘅地方,畢竟徐步高人死咗,無從抗辯。同樣, 葉繼歡 有無殺過人,我只能根據法庭喺佢生前嘅判決,睇唔到佢係有干犯謀殺嘅罪行,除非有其他新的證據,特別科學上嘅證據,證明 葉繼歡 要為中流彈嘅女護士負全責,否則對住一個死咗嘅人,就算佢係窮凶極惡嘅凶徒,將一大堆證明唔到嘅罪行加喺佢頭上,都係無乜意思,亦伸張唔到公義。

由 葉繼歡 呢件事,睇到由於依家香港人對警察嘅睇法,對過去嘅懷緬,或者對中流彈女護士不幸嘅同情,火遮眼,可以做出一啲好荒謬無倫嘅論斷,呢個亦係我將件事沉澱幾日,留番喺星期日休息至講嘅理由。純粹批評,並無意思,因為呢啲言論,背後都有社會背景,以及滿腔嘅怒火,但滿腔嘅怒火,並唔可以影響我們對事嘅論斷,否則我們好容易走火入魔。星球大戰講令黑武士由正變邪嘅Dark Side of the Force,原力嘅黑暗面,其實好多時,都係由人性而嚟,仲要本來係立意良善,或者有理由,但Dark Side is dark side。由左膠到熱普城,有幾多人本來十分善良變成走火入魔,我係睇到,呢啲就係人性大家無為意嘅恐怖之處。

發表迴響

你的電子郵件位址並不會被公開。 必要欄位標記為 *