方富邦-藐視法庭-min

方富邦 涉嫌藐視法庭:點解佢可以咁大膽

海關督察 方富邦 真係犀飛利,身為執法人員被人告上庭都算,仲要夠薑喺法庭裡面影相,仲要upload埋上facebook。依家 方富邦 會唔會因為佢喺facebook嘅所作所為,被律政司方面落鑊告佢干犯《簡易程序治罪條例》,甚至藐視法庭,大家真係要睇實。但點解 方富邦 作為一個受過專業訓練嘅執法人員,都可以狂妄成咁。喺呢方面,律政司司長喺何君堯喺法庭影相果單案,以及近年政府縱容紀律部隊人員反民主反法治言論,有十分之密切嘅關係,但係傳媒無幾個人可以仔細分析到。

方富邦 係梁振英政府搞出嚟嘅人辦

首先,何君堯身為律師,知法犯法喺法庭影相,律政司司長應該落佢鑊,罰佢五百蚊係俾公眾一個清晰訊號,呢樣嘢係唔做得,但依家政府見何君堯係自己友,因此唔告, 方富邦 都係見到何君堯咁都甩身,佢自己作為執法人員,更加應該有樣學樣,律政司司長應告唔告,係可以做成好嚴重嘅後果,依家梁振英當律政司係專政工具咁用,搞到朝綱大亂,依家咪睇到後果出嚟。如果今次 方富邦 都唔告,我恐怕日後其他紀律部隊人員,甚至好似傅振中一類根本視法治如無物,行為如納粹SA一樣咁仆街嘅人渣,就一定沒有最過份,只有更過份,屆時我真係可以唔知點收科。

另一方面,梁振英為咗紀律部隊變成專政工具,喺執法人員內部大肆宣揚言駛尊重法治嘅訊息,所以至搞出七警案(七賊案)之後嘅猶太人言論,以及警員集體問候人娘親呢啲爛仔行為。 方富邦 其實都係紀律部隊人員自我潰爛嘅副產品,一個執法人員,係受過基本法律訓練,知道呢啲嘢係唔可以做,但近年梁振英洗紀律部隊人員腦,只要好似丁蟹咁,自以為正義就可以無惡不作,所以 方富邦 至會膠到認為影法庭裡面啲人嘅相,就可以幫自己伸張正義。梁振英以及保安局局長黎棟國,究竟有無打算向公眾就呢條友嘅行為作出適當道歉,因為 方富邦 個人有問題都好,如果無你梁振英同一眾土共煽風點火,點可能喺紀律部隊出現一個咁嘅癲人。以往呢類案件,犯案嘅都係教育程度唔高嘅中國移民。呢件事,無疑係香港法治一大警告。

發表迴響

你的電子郵件位址並不會被公開。 必要欄位標記為 *