有線寬頻-赤化-min

有線寬頻 被人攞嚟走資兼赤化

有線寬頻 有得救,好多人以為堅係有得救,點知實情好可能係另一回事。我研究過股東名單之後, 有線寬頻 旗下嘅 有線新聞中國組,日後能否好似今日咁敢言,好成疑問,我相信有線新聞部嘅自主性,最多只能捱一兩年,好睇趙應春嘅功架。

有線寬頻 果兩個低調股東至係問題

首先講趙令歡,趙令歡係聯想控股嘅董事嚟,聯想控股同聯想集團最唔同地方在於,聯想集團(Lenovo),由於係一間同時有總部喺美國同中國嘅公司,唔敢玩得太過火,一旦玩得太離譜,美國佬要郁聯想集團好容易,Lenovo喺全世界嘅電腦生意更加唔駛做。但聯想控股係直接受控於中國科學院,換言之,呢次係香港有傳媒機構同電訊網絡主要股東,出現中國科學院做股東,絕對唔係乜嘢好事,十分之有問題。仲要呢個趙令歡,係團結香港基金嘅人,團結香港基金係董建華搞嘅,大家覺得呢個基金目的係做瓜香港,所以呢個低調股東,認真係魔鬼在細節,隨時日後做大股果個,就係趙令歡後面果班友,香港公屋嘅電視網絡,無喇喇受制於中國科學院相關財團。如果係我,即刻先cut 有線寬頻 嘅互聯網服務先。

跟住係李思廉,李思廉無錯係香港人,1978年畢業嘅中大校友,但問題係富大地產係一間廣州為基地嘅地產公司,最鍾意收舊樓發展,日後有線中國組要報關於拆遷果啲報導,可唔可以郁到同富大地產相關嘅嘢先?大家要記住,有線中國組可以維持相對獨立性另一個原因,因為九倉同會德豐喺中國地產嘅著力唔算深,但富大地產係一間主要業務喺中國嘅地產公司,我真係對獨立性能否維持抱持極度懷疑嘅態度。

所以如果我係有線中國組嘅人,寧願依家有線中國組個朵未臭之前,轉投其他外國傳媒機構,甚至識日文就搵NHK嚟做好過,因為呢次交易目的只有一個,就係為控制香港電訊網絡鋪路,兼且令有線中國組失去獨立性,有線搞到好似亞視咁,我覺得呢班友,只要收夠北京好處,一啲都唔care。但有點可以肯定,有線互聯網服務一定要cut,我唔知中國科學院班友,將會喺有線寬頻網絡搞乜古靈精怪嘢。

發表迴響

你的電子郵件位址並不會被公開。 必要欄位標記為 *