王岐山-min

王岐山 玩走資玩到過晒火位

近日有單新聞,炒香港地產嘅,必須注意,因為隨時係黑天鵝。習近平依家指令要查 王岐山 ,指 王岐山 包庇海航集團大規模走資。依家未知單嘢有幾堅,但如果局勢發展到 王岐山 惡鬥習近平,咁我相信,中華人民共和國呢個政權唔捱得好耐,唔天下大亂算係咁。

王岐山 唔係江系啲蠢才

王岐山 唔係一般人, 王岐山 係一個problem-solving嘅高手,由為共產中國嘅金融業打好基礎,到搞掂廣東省政府企業大堆爛帳,到搞到海南省嘅生態問題,到幫習近平掌管中紀委,應付果啲複雜到仆街嘅洗黑錢行為,呢個人,不單只知得多,而且做得出。如果習近平呢次要鏟起 王岐山 ,可以反映, 王岐山 根本係海南省諸候,海航啲友仔好多又同空軍有關, 王岐山 自己又揸中紀委,呢條友唔係無鏟起習近平嘅實力,所以一旦 王岐山 真係大戰習近平,一旦兩敗俱傷再由江系收拾殘局,中國係一定再好似大清帝國咁瓦解,呢個亦係北韓問題上,中國任由Trump去處置嘅原因,根本無力處理外面嘅問題,搞得掂 王岐山 已經好好彩,因為你根本唔知 王岐山 揸住幾多解放軍嘅實權。

依家海南航空被查,海南航空一口氣投咗大量啟德機場嘅地皮,咁有無可能發展落去呢?如果海航集團因被查,而搞到啟德地皮係搞唔掂,攞嚟曬太陽,或者賤賣俾其他中資或港資地產商,呢個對樓市都係十分之舉足輕重,所以我完全唔明點解,果啲成日將個錢字掛喺嘴邊嘅友仔,唔討論呢單料。呢單料可以代表香港地產會急升,因為更多錢要趕住入嚟香港避難,但亦可能代表香港地產急瀉,因為一旦啟德地皮要賤賣,對香港樓市嘅破壞力,完全係非同小可。呢個仲未計好多中資地產商,會唔會係習近平要調查或者鏟除嘅行列。

但更大問題係,如果習近平根本無力處理問題,中國貪腐更勁,國庫掏空更快,屆時真係迅速支爆,我睇最可能嘅劇本係, 王岐山 同江系運走晒啲錢後,突然消失喺北京政壇,然後剩低一個超級爛攤子習近平自己玩,之後喺上海、沿海城市大搞「民主運動」,然後將中國最有錢部分割出嚟,變成俄國式「民主」國家。而中國內陸,就變成一個大亂鬥世界,呢個係可能嘅支爆劇本。 王岐山 大戰習近平,意外敲起支爆第一擊。郭文貴搵有政府機構身份嘅美國之音爆料,梗係有啲料到。

發表迴響

你的電子郵件位址並不會被公開。 必要欄位標記為 *