有線寬頻-min-2

邱達昌、鄭家純入主 有線寬頻 :祝大家好運

有線寬頻 熄機危機有望解決﹐鄭家純、邱達昌為主財團,以供股方式入住 有線寬頻 ,有十億現金挹注嘅情況下,應該可以維持營運收費電視業務一段時間,我相信會擴大供股,令九倉最終可以完全抽身離開 有線寬頻 。

有線寬頻 編輯自主可唔可以維持

雖然 有線寬頻 唔駛執笠,因為有一筆資金挹注,而且九倉以債換股,應該九倉喺可見將來,會將呢批股票甩身,係睇邊個接貨。但如果我係 有線寬頻 嘅員工,特別係新聞台中國組嘅員工,應該繼續搵工,隨時準備跳槽,而呢單刁救唔救到 有線寬頻,我本身都有極大嘅疑問:

  1. 邱達昌、鄭家純呢啲人,會唔會維持依家有線新聞台嘅高度編採自主,我極有懷疑,特別會唔會上演亞視六君子類似事件,呢點尤其關鍵,依家九倉果種放任做法,我認為喺可見將來會消失。所以我話,如果我係有線新聞台嘅員工,應該持續尋求其他機會,一旦有一啲有違新聞道德嘅事件,有抗爭嘅空間,甚至可以即走,而唔駛啞忍,走去做咗幫北京塗脂抹粉嘅走狗都唔知。
  2. 七億現金能唔能應付奇妙電視需要嘅開支,呢點我好懷疑,ViuTV有免費無線廣播嘅覆蓋,但唔能夠殺出重圍,七億現金能否應付無大氣電波加持嘅奇妙電視,廣告商又信唔信有線寬頻,呢點係關鍵。無理由周大福同新世界包起晒所有廣告㗎。
  3. 有線寬頻仲有一個問題好大鑊,就係寬頻業務本身,DOCSIS 3.1升級做唔做先,要做嘅話,又要投資幾多錢升級網絡基建做DOCSIS 3.1,甚至直接升級做光纖。新世界喺2016年,至將固網業務新世界電訊賣俾香港寬頻,變成咗今日香港寬頻企業方案。依家你信鄭家純會上呢隻賊船,掟億億聲嘅錢去升級網絡,我怕最後結果係好似亞視咁,最後賣俾北京嘅資本,最終就係令 有線寬頻 赤化,香港又少一個睇得落嘅新聞台。

所以鄭家純、邱達昌入主 有線寬頻 係唔係一件好事,我唔係咁睇,呢啲吊鹽水方法,其實只不過令有線新聞台慢慢毒死,一如當年點樣毒死最敢言嘅亞視新聞部一樣。俾我,睇到呢個消息,我真係笑唔出,雖然我成世人都做過有線主持。

One thought on “邱達昌、鄭家純入主 有線寬頻 :祝大家好運

發表迴響

你的電子郵件位址並不會被公開。 必要欄位標記為 *