陳國基-林鄭月娥-min

陳國基 做特首辦主任?事不尋常

江湖傳聞,前入境處處長 陳國基 ,將會接任特首辦主任一職。雖然以處理文件能力而論,入境處由於以做paperwork為主,係咁多個紀律部隊中最強,都算係半個文官嚟。但 陳國基 做特首辦主任,成件事聽落好唔妥,我好懷疑林鄭月娥究竟係唔係一個實權特首,定係進一步嘅傀儡特首。

陳國基 唔係林鄭月娥愛將

首先,有兩件事大家必須要留意:

  1. 特首辦主任一般係候任特首辦主任直接過渡過去,減少當中嘅交接問題,劉焱就係直接由候任特首辦主任轉到特首辦主任。
  2. 候任特首辦主任,郵政署前署長丁葉燕薇係林鄭月娥愛將,林鄭月娥無乜理由唔留佢喺特首辦。

雖然 陳國基 係入境處處長出身,做過首長級公務員,但始終唔係政務主任職系出身,除咗保安局嘅嘢,其他部門嘅嘢,根本係唔熟書,所以我完全唔明點解, 陳國基 有可能做特首辦主任,呢件事好唔尋常。如果林鄭月娥搵唔到人就話,但依家係,林鄭月娥係搵到人,而且果個人係佢馬房嘅人,無理由做幾個月就調去第二個部門做問責官員,升到似直升機咁。

大家要留意一點,其實最早被中共滲透唔係警隊,而係入境事務處,警隊赤化,其實係曾偉雄做處長果陣嘅事,曾偉雄本來喺警隊就臭晒朵最親共果個。許淇安、曾蔭培同李明逵其實都唔係太親共,鄧竟成就飛虎隊出身,唔講得上有政治智慧。而入境事務處係喺葉劉淑儀領導下,一個個集體投晒共,成為紀律部隊最赤化嘅部門,所以歷任保安局局長,幾乎都係入境事務處出身,包括依家嘅黎棟國,呢個當然亦同 Home Office 成個training好易搞出啲奸狗有關。

我唔信陳國基係葉劉淑儀馬房嘅人,葉劉淑儀無咁大嘅叫價能力,足以可以安插佢自己嘅人入特首辦,如果喺中聯辦指揮,係都安插紅二代嘅容海恩大律師(佢老豆係華潤高層容仁彪),依家唯一可以解釋係,中聯辦信唔過林鄭月娥,但又安插唔到啲中聯辦嘅人入特首辦,所以就出怪招去監視林鄭月娥,林鄭月娥隨時係一個傀儡特首,以佢嘅性格,佢未必容忍咁樣被監視,我相信林鄭月娥自己劈炮走人,只係遲早問題。

發表迴響

你的電子郵件位址並不會被公開。 必要欄位標記為 *