葉繼歡-min

葉繼歡 樹倒不招風

《樹大招風》三大賊王其中一個原型,攞住AK-47喺條街駁火嘅 葉繼歡 ,終於因患癌病逝,享年五十五歲。由於 葉繼歡 當年登岸被捕果陣被打到癱瘓,喺咁嘅環境下,加上實有吸煙呢啲不良習慣,能夠活多廿一年,已經某程度算係咁。

葉繼歡 成也時代 敗也時代

當然, 葉繼歡 攞住枝AK-47喺市中心咁樣駁火法,呢樣嘢堅係好喪。以香港犯罪史近廿年經典人物計,最具挑戰性同爭議性當然係徐步高,大家會期待一套真係有深度嘅徐步高傳,張子強係徐步高以及,以人物而論最有戲劇性。表面上,季炳雄同 葉繼歡 都難寫,一味得個喪字,真係搞得唔好變爛片(你明點解杜琪峰捽夠三名新晉導演五年劇本,有解嘅),但 葉繼歡 如果代表係一種時代嘅反映,咁佢有佢留喺歷史嘅理由。

1981年-1997年呢段時間嘅香港,我可以用colourful同vivid嚟形容,中文我好難搵到一個exact wording去取代,果個年代,雖然未世心態瀰漫,但大家會去反抗,由反抗中尋求機會,乜都夠膽死。 葉繼歡 其實係呢種典型,被人拉咗,仲敢越獄,跟住班齊軍火,仲要係 AK-47,然後食大茶飯,當街駁火驚都無驚過,呢個就係果陣嘅香港。1997年前,九十年代前期嘅香港,係一個奇跡嘅年代,正面奇跡有Beyond、有李麗珊,負面奇跡有 葉繼歡 ,一個大限令香港人將自己嘅潛能無論如何推到最盡,呢個就係果陣嘅香港。比較之下,依家簡直可以用死氣沉沉嚟形容,依家香港係,做賊都灰過人,廿年前一餐大茶飯夠返中國農村收山隱居,依家?四條友打劫二千幾萬,連首期都搞唔掂,共產黨充分運用賣地機制,成為香港最大嘅賊,不用一刀一槍,盡收天下錢財,所以依家有人賣AK-47,都唔會有人攞嚟打劫,咁搵命搏,打到乜出嚟?依家啲黑幫,一個個被中共收編,理由都喺呢度,如果 葉繼歡 唔係1996年被拉,以2009年都夠薑喺赤柱監獄用原子筆襲擊獄卒嘅性格,恐怕佢應該被中共黨官捉入監獄,寂寂無名咁離開人世。佢見住自己嘅一生變成今年金像獎最佳電影至離開,佢未無機會睇,但時代已經對佢不薄。

發表迴響

你的電子郵件位址並不會被公開。 必要欄位標記為 *