萬能葱-min

面對中國染色葱指南:自種 萬能葱

雖然去年已經有人報導,中國出現噴過工業用硫酸銅嘅「染色葱」,但呢段消息﹐似乎近日先得到注意,好明顯有人喺街市買葱,摸上手成手藍色,瀨咗嘢就知出事。香港食環署果啲hea爆查核,香港人都要學吓自救。但無理日日食日本 萬能葱 咁豪,或者等夠270日啲葱成長㗎,咁可以點?

萬能葱 啲根留番喺度

因為香港天氣溫暖,所以其實好適合栽種 萬能葱 ,喺一田,一包 萬能葱 講緊依家十一二蚊包,食果陣,留低根部,同根部以上一兩寸嘅地方,然後搵包泥同花盆種住,你大概一個禮拜,就會生番長,跟住你剪走你想食嘅部分,啲根留喺盆果度,直至完全唔再種到為止。通常你有適當淋水(唔好過量,過量會死嘅),有啲施肥(廿日一次),可以種番兩三轉嚟食,乜都抵番晒,而且會好安全,因為你自己種嘅。如果你唔想用盆栽用嘅化肥,可以用啲咖啡渣作為肥料使用,呢樣都得嘅。而啲泥,用咗三次就抖一抖,改為種其他嘢,否則就會有蟲害,啲 萬能葱 就會唔靚,咁玩落去亦都無乜意思。當你食兩三轉之後,其實你棵葱都抵番。

當然, 萬能葱 係唔曬得,所以搵窗台通風嘅地方就得,太陽會曝曬嘅地方就千祈唔好,所以,我相信都幾適合香港啲石屎森林世界去試嘅,加上唔駛太多打理,總之少量灌溉就得,灌太多水反而浸爛啲根。咁樣,你就可以唔駛食果啲硫酸銅污染過嘅葱,真係食死自己都唔知乜嘢事。特別好多切葱入去食果陣,邊會咁神心洗過晒啲葱,結果自己食咗大量硫酸銅落肚都唔知,你估真係對健康好咩。

所以香港政府成日話要活化工廠大廈,其中一個方向唔係攞嚟做office,唔係攞嚟做走私基地,更加唔係攞嚟做酒店,而係重建本土農業,種一啲可以喺溫室種嘅作物,供應香港本土食用,至少香港政府可以透過發牌同食環署檢查,確保呢啲農作物係無問題,果啲販毒集團,都試過攞啲工廠大廈種大麻,咁其他作物一樣得,當然大麻利潤高,但有質素嘅蔬菜,只要夠新鮮,香港人願意透過網購呢啲途徑去定期訂呢啲蔬菜,大家對中國所謂嘅蔬菜監管已經忍夠,亦唔會再信食環署。

發表迴響

你的電子郵件位址並不會被公開。 必要欄位標記為 *