墟市-min

香港根本應該搞 墟市

雖然曾俊華嘅美食車計劃,梁粉故意搞到執行上問題多多,未有達到預期效果,但深水埗明火煮食 墟市 就好受歡迎,受歡迎到啲食物預多一倍都賣鬼晒。證明恢復 墟市 或者小販中心,根本係有得做,只要安排攤檔嘅政策適當嘅話。

新加坡都大搞小販中心,更何況香港

全世界最重視呢啲 墟市 ,應該兩個台語通行嘅國家,即係台灣同新加坡,新加坡一向極重視小販,大家都知住新加坡絕對可以增肥,因為全國嘅hawker center都食極都食唔完,甚至連李光耀同李顯龍自己都去埋一份,李光耀嘅早餐喺Maxwell Hawker Center買嘅,李顯龍會自己排半個鐘,同一般平民一樣,雖然佢已經係總理。新加坡已經係討論緊點樣令年青人入行,令新加坡嘅美食傳統得以承傳。台灣嘅夜市,簡直係香港人嘅至愛,邊個去台灣唔去夜市擦餐勁至得,既然新加坡同台灣都行得通,咁香港無理由搞唔掂 墟市 嘅問題,只要 墟市 嘅衛生搞得掂,其實可以全國推行,改善香港嘅本土經濟,甚至為鞏固旅遊業地位出一分力,喺新加坡,食hawker center係旅遊嘅必然內容,如果去得多新加坡,係會自己入組屋區食。

其實依家香港要 墟市 成功,主要係解決衛生問題,但有兩點係必須注意,呢兩點係好多人忽視:

  1. 唔可以俾食環署依家管熟食中心果種hea帶入墟市,近年食環署由管公廁到管熟食中心嘅衛生都勁hea,令人火都起,所以要重新建立兩個市政局係咁解,如果一時間唔能夠改革食環署,至少改由區議會去管理 墟市 ,長遠當然香港要好似英國同新加坡咁,行番市鎮理事會(Town Council)制度,因為呢啲其實係地方行政嘅範疇嚟。
  2. 墟市 唔好就地洗碗,但亦唔好用一啲即棄餐具,可以由洗碗哥之類中央洗碗公司去管理,而食碗費用,就加入喺租金裡面,香港出現一啲中央洗碗工廠,其實為一個良好嘅 墟市 管理打好基礎,之後就係處理食物設施嘅衛生問題要解決。甚至最好可以有電單車位,方便啲UberEAT、Deliveroo之類嘅外賣公司代送外賣,送到酒店或較遠嘅屋苑。

我可以講,依家個政府太hea,梁振英一日到黑只係諗政治鬥爭,佢其實應該放棄香港居留權,專心做共產黨算吧。

發表迴響

你的電子郵件位址並不會被公開。 必要欄位標記為 *