長毛-禮義廉-min

長毛 同禮義廉都係共產黨,唔駛分得咁細

如果我無話呢張相,係莫乃光國會議員所拍,真係無人信, 長毛 居然喺中國深圳,同成棚禮義廉合照,並且佢仲要喺中間。以往你試吓叫啲禮義廉同 長毛 合照,我估除咗曾鈺成,無其他人肯。當然曾鈺成係比較特別,因為曾鈺成都係算個真嘅共產黨。

長毛 呢張合照真係核突到一個點

十年前呢班禮義廉唔會同 長毛 合照,完全可以理解,因為 長毛 肯定係共產黨嘅專政對象,特別佢有托派嘅身份,呢個一定係共產黨嘅主要敵人,話雖一如我2004年喺新加坡《聯合早報》嘅文章講,全中國最根正苗嘅共產黨,其中一個一定係 長毛 ,因為成個中國共產黨,都唔知有幾多個黨員仲係知道乜嘢叫馬克思主義,甚至中國共產黨本身,其實都係賣假貨馬克思主義(相反,受法共影響相對深嘅越共,仲成日會講馬克思)。但依家港獨派興起,而 長毛 長期以一個大中華膠姿態出現,根據中共一向團結次要敵人,打擊主要敵人嘅戰略理論, 長毛 反而變成咗要團結,要統戰嘅對象,所以 長毛 戴住黃絲帶都可以入深圳,仲要喺深圳公安局門口,成棚禮義廉群魔拱照咁圍住佢嚟影相,如果我係 長毛 ,實會覺得當中有啲嘢係勁唔妥,都係果句,當敵人稱讚你果陣,你一定係做錯咗某啲嘢,而 長毛 好明顯平日做錯咗啲嘢,至成為咗中共嘅主要統戰對象而不自知。

如果 長毛 嘅終極目標,仍然係要推倒一黨專政,而唔係所謂中國統一,其實應該反過來,拒絕呢啲禮義廉嘅統戰,反過來,要不論國家認同,團結埋本土派同獨派,共同對付共產黨,因為共產黨至係主要敵人,而本土同港獨,應該只不過係次要敵人,仲要現階段力量弱咗好多嘅次要敵人。但好明顯,由呢張相,再加上喺特首選舉期間,佢狂打lesser evil薯粉黨嚟睇, 長毛 同埋一眾左膠,喺主要敵人同次要敵人呢個問題上,是非同形勢不分,所以禮義廉都突然間視 長毛 為朋友,十分之願意同 長毛 合照,分分鐘成棚土共,就攞住莫乃光影嘅呢張相,向北京方面領功,表示喺團結泛民呢方面,罕有地展現出成功。

當然, 長毛 同禮義廉其實源同一系,真係唔駛分得咁細,愛黨不愛國呢樣嘢,又一次證明係唔存在。

發表迴響

你的電子郵件位址並不會被公開。 必要欄位標記為 *