核戰

去韓國玩,你諗清楚 核戰 風險?

相信復活節假期,好多人想去韓國玩,我並唔係危言聳聽,依家朝鮮半島戰雲密佈,去韓國玩係唔係需要考慮戰爭,甚至 核戰 風險?雖然朝鮮半島緊張局勢,過往好多時得個嚇字,但呢次,我睇並唔係無風險,如果大家去旅行,係應該小心啲好,至少有所備。

核戰 風險唔係只代表核爆

當然, 核戰 唔係一定磨菇雲,因為北韓嘅導彈技術係好有問題,美國部署薩德導彈係十分有道理,只不過,以北韓同南韓之間極近距離,特別漢城根本係邊境城市(你去過坐都羅山駅嘅KoRail火車咪明),依家最怕唔係北韓射啲洲際導彈,而係亂射一啲有核污染嘅炮彈去南韓,而射導彈唔係射美國,而係求其向黃海射,甚至射到去中國水域,報復中國起北韓尾注,搞到首爾附近一堆核污染,你都有排煩。但無論如何,如果你需要去韓國,有幾樣嘢係要注意,特別可能涉及撤僑嘅問題:

  1. 旅遊保險唔係大晒,旅遊保險可能係唔保戰爭,你要睇清楚你自己嘅旅遊保險, 核戰 唔保嘅就更肯定,所以唔好以為保陃係乜都有得賠有得保,呢個諗法係黐線,至少喺依家北韓局勢肯定係。
  2. 如果你要去韓國,得你一條友,就唔好用特區護照,因為依家唔知喺企喺邊一邊,同埋中國使館大難臨頭各自飛嘅惡習,簡直係惡名昭彰,如果係一家人去,最好其中一位,最低限度係持有BNO,因為一般撤僑果陣,係全家一個單位撤,當然,你果啲中國籍親屬,好大機會要自己俾番撤僑嘅費用。
  3. 如果你持British Citizen或BNO,一抵達南韓,請將行程同聯絡方法,連埋隨行所有人國籍及護照號碼(俾埋護照data page最好),寄去:[email protected],一旦有乜冬瓜豆腐,英國使館可以立即帶你走。同埋記低呢個電話: +82 (0)2 3210 5500
  4. 情況容許嘅話,請留意當地美軍電台嘅廣播,網址:http://www.afnpacific.net/AFN-360/,呢個忠告同時適用喺日本西南部嘅旅客,都係果句,你唔知金正恩條黐線佬開邊瓣。
  5. 見勢色唔對,改機票走人,中 核彈 呢樣嘢,氣化還好,中輻射慢慢死,衰過凌遲。

希望南韓唔會有事,雖然戰事風險頗高,去韓國玩,小心駛得萬年船。

One thought on “去韓國玩,你諗清楚 核戰 風險?

  1. 「你去過坐都羅山駅嘅KoRail火車咪明」
    「駅」是日本寫法,韓國寫法應是「驛」。

發表迴響

你的電子郵件位址並不會被公開。 必要欄位標記為 *