鉛水-私樓-min

鉛水 蔓延私樓,大家自求多福

2015年嘅 鉛水 危機,大家好似唔記得咗,點知依家又返嚟。水務署公布,深水埗有幢單棟大廈,內部更換水管期間,有人使用含鉛部件,被水務署抽查捉到,依家未知有幾多單位受影響,而邊座大廈中招,政府亦竟然以業主未允許為理由唔公布。

鉛水 係公眾利益問題

首先, 鉛水 係公眾利益問題,無理由要果座大廈業主批准,至可以公布邊座大廈出咗事,唔通租客唔會受 鉛水 嘅影響架,而果座大廈單位嘅準買家,亦都有權利知道,自己所住嘅單位,有無受到 鉛水 嘅影響,依家政府嘅做法,亦都實在太豈有此理。話雖我自己係有賣 鉛水 嘅套件,但由公眾利益而論,政府係有責任,亦應該去公布邊啲大廈嘅單位有問題,而唔係吓吓搵我們呢啲生意佬嚟搞。我雖然係做生意,但我寧願做一啲開心嘅生意,而唔係大家怕咗飲 鉛水 ,我跟住係賣 鉛水 嘅測試套件,我真係覺得呢樣嘢係有啲黐線。

當然,水務署依家肯驗私樓嘅水務設施有無含鉛配件,始終係好事嚟,至少唔好再俾啲師傅買埋啲中國製嘅配件,中國廠商堅係草菅人命,完全唔負責任,政府係有責任把關。只不過,依家政府嘅監管範圍仍然只限全大廈嘅工程,而且呢次公布係單幢樓,如果涉及大型屋苑,或中國地產商,水務署會唔會顧及公眾利益,主動公布堅係難講,依家呢個城市官商勾結,真係太鬼嚴重,你完全唔知道,政府會唔會因為某個地產商嘅緣故,將消息封鎖,或者呢種講法係好鬼陰謀論,只不過,當你見過橫洲事件政府果啲表現後,你真係好難再對呢個政府有信心,人人變晒莫探員咁嘅心態,你都唔怪得市民。

所以我依家,會恢復番訂 鉛水 測試配件,係由美國訂返嚟,當然,一方面,我自己肯定要用,真係唔知自己會唔會中咗招都唔知,另一方面,我相信市民係有可能有需要用到呢啲測試配件,進行快速測試,當然,如果有問題嘅話,詳細嘅測試結果,最好係搵有公信力嘅化驗所,因為化驗所有齊全套架生,又有專業人士,一定比我呢啲喺美國買返嚟嘅配件準確。喺香港生活,真係小市民交稅俾呢個政府,都唔知為咗啲乜。

發表迴響

你的電子郵件位址並不會被公開。 必要欄位標記為 *