電子版香港法例-min

電子版香港法例 點解會搞出一鑊泡

相信呢排,好多人用網嚟查法例,都侷住用番HKLII,因為 電子版香港法例 亂晒大籠,喺Google搵到舊版網站,但無法跳到新版網站嘅同章節條文,亂到炒晒粉,全香港法律人以至網民,甚至差佬都鬧爆,究竟發生乜事。

搬新website係合理, 電子版香港法例 新版有經核證版本,對好多市民或律師,唔駛要保留printed copy嘅認證版本,確認法律條文嘅確實字句,本為好事。但搬website成個過程部署失當,就令成件事炒粉炒到爆。

唔做sitemap,亦唔做適當transfer

首先,政府嘅軟件供應商,有責任喺舊網站寫番個script,將舊系統嘅連結,自動指去新系統嘅相應連結,如果新系統係用permalink,同舊系統一樣嘅話,其實應該唔難做到自動指向動作嘅script。我唔明政府班懵撚,點解無要求個供應商做呢步,呢個照計,係可以用個script做得到嘅事嚟。

另一方面,政府應儘量避免市民search到舊版網站,一方面,應該開始喺舊網站用robot.txt block咗google等crawl,避免抓取資料,另一方面,新網站亦應該儘快提供xml sitemap,等google可以對新網站進行indexing工作,呢個係差唔多新網站一出就要做,否則市民就會喺Google搵到大量令人confusing嘅search result。但好明顯,政府班蠢材係無考慮到search engine嘅問題,唔知網站要主動交sitemap,甚至要政府派人同Google商討成個過渡安排,又無用robot.txt block咗search engine啲robot,結果咪炒車炒到傻,市民因此無所適從。我諗呢啲search engine遊戲規矩嘅嘢,政府同啲大vendor無理由完全唔知,呢次真係要搵申訴專員調查一下發生咗乜嘢事至得,呢個一定係好大嘅行政同技術失誤嚟。

呢個亦可以睇到,政府係搵到傻人去管IT,咁搞落去,笑料實會層出不窮,沒完沒了。

發表迴響

你的電子郵件位址並不會被公開。 必要欄位標記為 *