United Airlines 事件應該對準間公司,唔係對準美國人

United Airlines 強行驅逐已經登機乘客呢件事,引起美國全國一致炮轟,連美國ABC嘅節目都玩膠,整咗段改版嘅 United Airlines 玩鳩佢,都知呢單嘢絕對唔係種族問題,而係個別公司嘅管理特別仆街,如果香港因航己經叫管理不善,咁美國因航就不如改名做垃航算,專門用嚟運送垃圾就差唔多,例如核廢料。只不過,香港啲傳媒,懷疑受張曉明指揮,個個將件事對準美國人種族歧視,以為受害者係華人,點知⋯⋯受害者原來係越南人,當堂笑咗。

United Airlines 事件張曉明抽中火水

Dr. David Dao無錯,可能有華裔血統,只不過,根據上世紀五十年代到七十年代,中共同南洋各國簽嘅建交公報或條約,南洋華裔唔係中國人,而係佢地出生地國家嘅人,否則黃世澤就唔會喺香港法律上係印尼裔英國籍香港居民, David Dao 喺中共嘅定義係越南裔,據聞越南同中國爭奪緊南沙群島,啲中國糞青唔係要搖旗吶喊,話支持 United Airlines 打柒越南人咩?話晒 United Airlines 同 Air China 兩大強國嘅航空公司,都係 Star Alliance嘅成員喇,係唔係?

呢件事可以反映,張曉明同埋中聯辦主管香港意識形態嘅友仔,對中共南洋政策,以及「僑務政策」嘅認識極為缺乏,仲學人講乜嘢一帶一路喎,由周恩來到依家嘅政策都係,華裔人士攞咗外國國籍,就唔係中國人,中國係唔接受雙重國籍,香港容許雙重國籍只係權宜行事,但如果要忠實履行周恩來以嚟嘅國籍政策,香港果啲英籍人士,全部應該要選擇國籍。所以,香港傳媒,唔好見黃皮膚、黑頭髮,姓名似似地華人,就認屎認屁,認屎認屁認得太多,終有一日會跣鑊甘。更何況,美國嘅種族歧視,至少喺飛機上唔嚴重, United Airlines 係無差別咁對乘客差,否則唔會有人建議喺 United Airlines 加多一種艙位叫 Fight Club, Dr. David Dao 受嘅絕對係Fight Club 嘅服務, United Airlines 應該 issue 張寫住 Fight Club membership 嘅 Mileage Plus卡俾佢。

簡單嚟講, United Airlines 件事,大家係要對準公司,唔係對準全美國人,知無?

發表迴響

你的電子郵件位址並不會被公開。 必要欄位標記為 *