振替輸送-min

振替輸送 :解決港鐵故障問題

其實要解決港鐵故障跟住全香港交通大亂其中一個方法,並唔係吓吓靠接駁巴士,呢個完全唔係路。有讀者提出,日本人用開嘅方法: 振替輸送 。喺香港巴士普遍都有八達通,所以港鐵車飛都係一張NFC Card嘅年代,係絕對行得通,甚至比日本果啲用紙飛,定期券果啲亂七八糟嘅情況仲簡單。

振替輸送 :港鐵公司請大家搭巴士

喺日本,出現列車故障、人身故障,鐵路公司又好,巴士公司都好,會退錢,同埋出一張振替車票,你憑票可以坐其他公司嘅類似路段,但車費由肇事嘅公司找數。一般日本你揸住呢類車飛,都要去有人改札口出入閘,就算用ICOCA、SUICA都好,都係要用有人改札口處理過張飛,然後至可以去搭車或出閘。日本振替輸送規則可以好複雜,因為涉及有人揸Pass、定期券搭車嘅問題,而日本單程票最有名嘅磁性紙車飛,亦係相當之大嘅問題,如果唔識日文真係頭都痕。

但香港比日本簡單好多,因為港鐵嘅回數券(都會票),單程票,全部都係NXP Mifare Ultralight 或 Sony RC-S966 Felica Lite (因為NXP啲NFC Tag鑊氣太勁,最後用番Felica Lite)嘅NFC Tag嚟,基本上,巴士公司可以有兩種做法,但全部可以用IT方法解決。

  1. 指定巴士路線嘅八達通機,載入港鐵災難模式嘅功能,一旦港鐵出事,災難相關模組會立即接受港鐵單程車票付款,港鐵公司只要派員喺連上收回乘客嘅車票即可,而都會票亦唔會扣車錢(但會核對有無入閘紀錄,有入閘紀錄會抹消相關紀錄)。小巴嘅八達通機一般比較削,可能要升級之後,至可以做出同類動作。
  2. 巴士公司派員,利用特別嘅NFC Tag Reader(例如載有特別App嘅Android手機)核對車票,並即時收走單程票乘客嘅車票,俾乘客上車,而巴士公司,負責將收到嘅單程車票交俾港鐵公司。

簡單嚟講,香港比日本更有條件做到振替輸送,至少技術係可行,八達通公司一定搞得掂,呢個係運房局肯唔肯做嘢,如果肯做嘢,我相信情況係可以受控制。

One thought on “振替輸送 :解決港鐵故障問題

  1. 問題係各公共交通服務機構都無合作,連跨巴士公司轉乘都罕見的時候,更何況係港鐵同巴士公司的合作

發表迴響

你的電子郵件位址並不會被公開。 必要欄位標記為 *