啟德線-min

啟德線 構想:香港版中央線

觀塘線爆大鑊,我對住Google地圖諗咗成晚,東九龍線係蠢到加零一,但九龍東西之間嘅鐵路負荷亦飽和,無理由觀塘線四軌化。我根據東京JR中央線嘅套路,諗到香港版中央線,亦即係 啟德線 嘅可行性。

啟德線 解決多線轉車問題

依家成個九龍變咗通勤地獄,除咗過海線唔夠外,仲有一個好恐怖嘅問題,就係橫向嘅鐵路得一條,就係觀塘線,有人想由大角咀去觀塘或將軍澳,只能夠坐到佛誕,而東涌線、荃灣線、沙中線、觀塘線、東鐵線全部都係連繫咁滯,結果大家迫晒喺九龍塘、金鐘等站轉車,唔大劑就出奇。而要解決呢個黐線問題,需要唔係東九龍線只係服務民賤聯選民嘅服務,而係一條設計上類似東京JR中央線,可以快速將啲人由東西兩個方向運送,同埋好容易由A線轉到B線轉嚟轉去,大大提高鐵路系統嘅便捷性。東京JR中央線,無論如何係好成功將啲人由東京市中心送到新宿,再由新宿送到東京以西或以南任何地區,無其他線更加好扮演中央線嘅角色。

而對香港嘅方案,就係啟德線,可以叫中九龍線,或者叫亞皆老線,由奧運站出發,經旺角,解決東涌線同荃灣線只有荔景可以轉車嘅問題(東涌線可以更有效分擔荃灣線嘅負荷),喺旺角東,就轉東鐵線,唔駛全部集中喺九龍塘站打大戰,跟住係培正站,馬頭圍站同啟德站可以轉搭沙中線,然後九龍灣可以轉觀塘線,變相令觀塘線龍翔道段唔會爆棚,跟住睇山勢,我認為安泰有多啲居民需要,但如果以建築難度論,可能協和站比較好起,跟住去到秀茂坪,然後喺藍田再會合觀塘線,如果觀塘線已經環線化,就可以轉車過海,跟住以調景嶺做終點站,轉坐將軍澳線。有呢條線,基本上九龍東西通行就唔會有太多嘅麻煩,當然呢條線好可能要由政府出資,因為除咗培正或者巴富、協和幾個車站可以靠地產賺錢,其他都比較難,但旺角可以考慮透過大規模市區重建去籌錢,因為旺角站有可能成為一個類似新宿站或東京站嘅物體,至能夠應付龐大嘅人流需要。但呢條線,一定比「東九龍線」真正有效啟動九龍東。

為咗香港人交通著想,我唔介意攞呢條線嘅構思同林鄭月娥新政府慢慢傾。

One thought on “啟德線 構想:香港版中央線

  1. 其實香港最需要起既係環狀線,類似JR東日本既山手線或者東京都營地鐵既大江戶線。

    環狀線將地鐵大部份既線連起,唔單止縮短程車距離,唔洗下下要係指定轉車站轉車,更可以做到分流,減輕某D線既負荷,好似宜過由觀塘過海一定要用將軍澳線,但如果有環狀線,某就可以繞過將軍澳線都可以過到海。

發表迴響

你的電子郵件位址並不會被公開。 必要欄位標記為 *