港鐵-故障-min

港鐵 故障嘅處理方案:無理由只靠港鐵接駁車

港鐵 今日中孖寶,荃灣線同觀塘線喺放工繁忙時間同時故障,香港交通亂過亂世佳人,只能用一鑊粥嚟形容。其實 港鐵 一炒粉,香港交通就變一鑊粥,因為香港完全無後備交通配套可言。齋靠港鐵接駁車去處理根本係黐線,好似今次咁,係全系統故障,唔通 港鐵 有好似九巴、城巴、新巴咁多巴士,足以應付呢啲緊急情況嘅要求,呢啲諗法係一啲常識都無。

港鐵 事故預備線應該出現

簡單嚟講,香港運輸署應該有個應變中心,而呢個應變中心一收到 港鐵 有系統性故障嘅報告,特別喺繁忙時間,應該係咁做:

  1. 九巴同新巴嘅100號同300號,喺 港鐵 荃灣線出現嚴重延誤果陣,立即開始服務,呢個隨時有效率過港鐵自己啲接駁車多多聲,至少巴士公司可以隨時抽調果啲102, 112嘅弼街特車去應付局面,維持過海線嘅基本營運,至為重要。當然,長遠嚟講,300同100係必須重新投入服務,因為依家荃灣線真係太爆棚,連東涌線分流都搞唔掂,依家繼續咁玩法,遲早玩死全世界
  2. 要求營運尖沙咀同中環嘅專線小巴公司,盡量抽調車輛,臨時組成天星特別線,穿梭中環港鐵站同天星碼頭,以及尖沙咀港鐵站同天星碼頭,盡量運用天星碼頭嘅運載力,同樣嘅道理,部分樂富一帶嘅搭客,可以抽去九龍城碼頭送去北角。盡量將乘客運走,係解決交通問題嘅唯一目標。長遠嚟講,渡輪服務應該重開,並且提供相應嘅接駁,都係果句, 港鐵 並唔可以取代任何嘅公共交通,因為 港鐵 個系統都係會壞,而且一壞會一發不可收拾。
  3. 今日潮聯等紅van趁火打劫,坐地起價,對付呢啲撚樣,係搵隊黃腳鱲拜候,一有double parking、triple parking,立即抄牌,反黑組可以考慮喺小巴站頭高調拘捕部分黑幫分子,如果警隊想挽救一吓自己嘅形象嘅話
  4. 長途特急巴士,其實都要加強,因為長途特急巴士大大彌補咗港鐵只有local service(各駅停車)嘅不足,香港果啲雙層巴士,根本係另類鐵路嚟。可以行高速公路嘅特急巴士,廢除企位,票價略加,但係,堅係點對點,同埋果啲車係唔鎖引擎,可以行盡80公里,甚至100公里/小時,都俾佢行

香港需要認真研究通勤多方面作戰,咁玩法會玩X死市民。

發表迴響

你的電子郵件位址並不會被公開。 必要欄位標記為 *