港鐵-故障-min

港鐵 沒有最混帳,只有更混帳

今日簡直係 港鐵 開出故障全壘打,沒有最混帳,只有更混帳, 港鐵 先因觀塘線架空電纜故障,全線癱瘓,跟住又嚟荃灣線車門故障,又停住架車,放工時間最繁忙嘅六點半先玩啲咁嘅嘢,金鐘站據我朋友所講,根本係地獄嚟。而觀塘線車廂因無電,又熱又焗就更地獄,再嚟東西九龍都有大塞車發生,情況仲差過東京地震,要由市中心步行返千葉縣。

港鐵 搞邊科?

斷電纜呢家嘢,係 港鐵 眾多事故中最惡搞,首先,所有列車一定停擺,跟住緊急整好條電纜都要三個鐘,兼且整完條電纜,都唔可以立即全速投入服務,果吓維修只係臨時頂住先,要捱到收車之後,至可以進行詳細嘅維修。衰電纜遠遠惡劣過衰人身事故,或者車門一類嘅小意外,而放工時間搞啲咁嘅嘢,就除咗可以用地獄嚟形容之外,無其他嘢更加適合嘞。

港鐵明知電纜唔壞得,都搞成咁,依家真係想知呢幾年, 港鐵 問啲乜公司買電纜,而電纜嘅保養維修又係點做,同埋啲中國製列車,果啲集電弓又會唔會設計上有問題,令電纜可以扯斷。大家要記住,電纜並唔係膠,或者係棉線,電纜係一條好粗嘅銅嚟,點解可以扯斷嘅呢,真係奇哉怪也。

當然,運房局例牌又係要港鐵交報告,但運房局自己,其實都要向香港人交報告,點解依家香港無港鐵會死,因為無任何替代嘅交通工具,或者替代交通工具嘅限制奇多,根本無法喺緊急事故期間取代 港鐵 運作,況且, 港鐵 其實一早係超載,但政府仍然係要搞 港鐵 優先政策,硬要塞晒啲人入去,講真,真係唔出事出鑊甘就奇。好似今次,如果隧巴線100同300仍然存在,你覺得件事有咁大劑?依家香港係一啲剩餘運載力都唔容許,結果咪係一出意外,完全無走盞位可言。唔通政府班友真係認為港鐵嘅接駁巴士服務,足以取代港鐵服務本身咁強悍?好明顯唔係果回事囉。

港鐵 嘅維修水平唔知點監管,政府扶助係一鐵獨大,如果政府再咁搞落去,唔該恢復一啲渡輪線,或者喺海底隧道開闢人行嘅通道,東京同千葉之間仲可以係行,但維多利亞港係無得行,全民聚晒喺尖沙咀同中環過海實仆硬街。

發表迴響

你的電子郵件位址並不會被公開。 必要欄位標記為 *