中環站-min

中環站 只落不上 金鐘站 等睇世紀大混戰

今日放工去 中環站 坐荃灣線地鐵,隨時會中大伏,因為港鐵唔知邊個天才諗出嚟嘅屎橋,實施同博覽館站一樣人潮管制措施,就係1835 中環站 只落不上,要坐荃灣線唔該請移玉步,一係去坐東涌線再轉車,一係就坐港島線去到金鐘之後再轉車。

中環站 只落不上措施雖好,但一定製造混亂

中環站 喺特定時間搞只落不上政策,本來係想疏導金鐘站嘅乘客,因為金鐘站長期唔知幾時上到車嘅局面,喺金鐘站隨時等七班,甚至十班,都上唔到車,所以推出呢啲臨時措施分流乘客,一架空車可以載晒喺金鐘站滯留嘅大量乘客,咁可以紓緩金鐘站嘅壓力,所以呢個政策係立意良善。只不過,中環站並唔係啲閒站,本身都有大量乘客喺 中環站 放工,大家諗吓如果啲乘客先坐港島線車,再喺金鐘站轉番荃灣線嘅車,本來港島線都已經亂七八糟,跟住成班友又衝去金鐘站嘅荃灣線月台,或者喺金鐘站又轉番荃灣線去中環嘅車,喺中環留喺車度一直唔等等運到,屆時仲唔亂過亂世佳人,真係留名睇世紀大混戰都得。

其實我都講過,依家金鐘站已經變成咗好似東京站咁嘅萬佛朝中式車站,依家加埋南港島線列車,已經轉車轉到一鑊泡,如果日後沙中線落成,加埋大批要去九龍中部,以及新界東部,甚至中國深圳市嘅乘客喺度,金鐘站閘入面係乜設施都無,唔似東京站有大量購物、飲食設施作為緩衝,屆時金鐘站仲唔變成困獸鬥,香港重演上世紀七十年代,日本首都圈國鐵暴動真係指日可待,因為無論港鐵公司用乜嘢措施紓緩人流,除非香港人口減少,以及決心實行類似東京的通勤五方面作戰,加建同改善香港嘅鐵路設施,否則天下大亂真係指日可待。

當然,我相信有可能要沿塘尾道或新填地街興建一條鐵路線,紓緩荃灣線嘅壓力,因為依家雖然有東涌線,但礙於當年陳佐洱、魯平呢啲仆街阻止青馬大橋興建四條鐵路線,東涌線同機場快線共用路軌嘅後果後,東涌線最盡都係每十分鐘一班,一係就青衣掉頭,情況十分之膠,依家已經係無擴建嘅可能性。如果東涌線同荃灣線用家,迫到阿媽都唔認得,記得詛咒陳佐洱同魯平兩條撚樣。

發表迴響

你的電子郵件位址並不會被公開。 必要欄位標記為 *