田北辰-新民黨-min

田北辰 退出新民黨:中聯辦出手?

田北辰 終於退出新民黨,雖然 田北辰 有意退出新民黨,本來唔係新聞嚟, 田北辰 想走政界傳咗好耐世紀,起碼都九個月。只不過,喺特首選舉之前, 田北辰 想走,中聯辦都千方百計要慰留,但呢次,好可能係中聯辦自己都玉成其事,由得 田北辰 同六位葵青、荃灣地區嘅區議員走。

中聯辦無法控制 田北辰

田北俊同 田北辰 ,雖然兩兄弟都唔妥,但兩兄弟近年喺政治上嘅醒悟大咗好多,田北俊變咗一代玩膠專家,連候任特首都夠膽整蠱,至於 田北辰 ,開始知道乜嘢都跟政府係累街坊,例如小巴加座位問題,或者李波事件等等,對於無乜生意喺中國,真係喺香港為本嘅政客嚟講,中聯辦只係一班倒米壽星,中聯辦都唔可能控制全部建制,只要果區淺藍加淺黃票係夠嘅,駛鬼你班西環班大帝,有乜事自己上北京傾都得喇。所以田北俊開始狂玩膠後, 田北辰 亦開始變成新民黨內部不受控制人士。

當然,中聯辦唔會想新民黨咁散晒,因為中聯辦喺新界西部城市地區,特別泛民根據地葵涌地區,以及中產越嚟越多嘅荃灣城市地區根本實力唔夠, 田北辰 一直無退黨,其實係中聯辦死扯爛扯。但上個月嘅特首選戰,葉劉淑儀最終被迫歸邊,但以好多人所知, 田北辰 並無投降,堅持將票投俾曾俊華,去到呢個位, 田北辰 同葉劉淑儀分家係定局。葉劉淑儀仲幻想中聯辦會俾到嘢佢,而 田北辰 完全係拋棄幻想。當佢知道單靠薯片黨嘅票,都可以維持佢現有嘅政治實力同版圖果陣,咁點解仲要黐住一個講就凶狠,做就毓民嘅女人呢?而我個人相信,依家跟 田北辰 嘅荃灣同葵青區議員,好多人都係自己地方有一定實力打返嚟,同中聯辦種啲飛,或者組織飛無乜關係,又無乜生意喺中國,所以夠薑採取行動。

依家出現香港政壇其中一次大變動,新民黨睇嚟會實力大減,依家大家可以留意公民力量嘅去向,呢班香港投注最精準嘅政治投機分子(根本係港同盟沙田支部變出嚟),如果突然間起容海恩飛腳,自立門戶或者另擁新主,大家應該知道有啲事係發生緊。中聯辦嘅力量,其實係慢慢消減緊,張曉明以為自己好威水,真係大錯特錯。

發表迴響

你的電子郵件位址並不會被公開。 必要欄位標記為 *