樹大招風-min

樹大招風 與 港中矛盾

樹大招風 攞到金像獎最佳電影榮銜,北京隨即封殺,搜狐等係連片名都唔准提。一切都喺意料之外,因為 樹大招風 表面上係一套拍賊王嘅片,但借賊王講政治係不言而喻。雖然呢套片嘅導演唔係杜琪峰,但三位導演都係杜琪峰嘅徒弟,杜琪峰同游乃海係咁捽套劇本,你話呢套片唔係杜Sir講政治嘅拿手好戲,真係講到無人信。

港中矛盾 日趨緊張

同樣係歐文傑有份(無錯,《十年》其中一位導演,《 樹大招風 》佢又有份),《十年》變咗香港版嘅 Braveheart,為日後香港任何抵抗運動定立咗基調,而《 樹大招風 》其實反過嚟,係《十年》嘅前傳,講述香港點解要出現《十年》描述果種抵抗,表面上係講三個大賊做世界但做唔到,實際上講,香港係點樣死,同幾時死嘅。所以北京對呢套片嘅態度同《十年》一樣,香港電影金像獎班籌委未必覺,但北京搞意識形態嘅友仔好清楚,呢套片雖然唔係杜Sir手筆,但實際上,比《黑社會》系列更心狠手辣,唔係因為《 樹大招風 》有涉及中國貪官嘅情節,就過唔到合拍片嘅送審,事實上係,成套片嘅古仔,以至對人物經歷嘅描寫,都已經係另一個方式拍嘅《十年》,你要北京批你將呢套片上中國放映,可能性係零,北京係連剪唔會接受,同《十年》一樣。

所以杜Sir做薯粉,同我做薯粉嘅心態其實好似,我們支持曾俊華係俾呢個政權嘅最後機會,我們全部都知依家港中關係可以有幾差,同埋個後果。金像獎評審咁樣投票,其實一切大局已定,香港同中國之間走上不歸路,只不過係遲早嘅問題。中國要改變香港人嘅價值觀同意識形態,拒絕履行一國兩制嘅承諾,香港人決意保留由1841年立國以嚟嘅意識形態同價值觀,衝突因此而起。我相信香港電影金像獎,明年同後年得獎嘅電影,都會係政治味奇濃,因為當今香港最大嘅問題,最好嘅題材就係政治,特別係港中之間矛盾嘅政治,而呢個問題,除非中國同香港之間,有適當方式分家,否則呢個問題永遠唔會結束,甚至成為香港文學、戲劇最大嘅題材來源同主題,呢個左膠係一百世都唔會明。

發表迴響

你的電子郵件位址並不會被公開。 必要欄位標記為 *