megabox-扶手電梯-min

Megabox 扶手電梯出意外:香港發生乜嘢事

香港人似乎越嚟越難安全生活,想飛去其他國家玩,就遇正 AutoTrac 3發傻,星期日留喺香港,想去 Megabox 食嘢,睇場IMAX嘅戲,或者去宜家逛,依家咁都會遇到扶手電梯意外。有一名五十九歲婦人,以及七個月大嬰兒受傷,依家未知係唔係涉及機件故障,依家似係有人身體不適。只不過,香港超長電梯嘅安全問題,仍然係值得高度注意。

超長扶手電梯嘅安全使用

本來香港無咁多超長扶手電梯,喺上世紀八十年代,最經典果條已經係港鐵炮台山站由月台往大堂果條,呢個當然唔係港鐵想起到咁長,而係港鐵炮台山站嘅地質問題,需要興建得特別深,至搞到咁嘅款。但近年由於啲商場已經起得好高,又唔能夠吓吓叫啲消費顧客搭𨋢,所以依家好多商場,有啲四五層樓嘅天梯,好似時代廣場呢啲,本來無天梯,都要興建跨越中央空曠地帶兩層扶手電梯,次次我呢啲有啲畏高症嘅人去搭,都係有啲心驚驚。

當有咁長嘅扶手電梯,由於一有人跌倒可以好大件事,所以,係應該勸諭老人家,或者有帶嬰兒嘅人士,唔好用果啲天梯,應該行多兩步搭番𨋢,因為呢啲老人家或嬰兒四五層樓碌落嚟,講緊可以係無命。另一方面,電梯嘅維修保養監管係好重要,機電署係要特別對天梯作出檢查同監管,唔可以齋靠電梯公司,因為呢啲天梯嘅風險因素係比較高,風險因素相對高嘅電梯設計,作出更嚴格嘅監管,亦都係一件好順理成章嘅事,否則人人唔搭天梯,果啲商場真係搵阿水去行咩。

但機電署點監管都好,香港電梯維修技工嘅薪酬、待遇、專業水平、操守等等,都係去到一個要檢討嘅時候,新加坡近年出現好多古靈精怪嘅壞𨋢事件,由成座組屋啲𨋢壞晒,到一啲奇怪嘅電梯意外都有,呢啲都同新加坡成個社會唔肯向「基層工作」出高人工,以及重視佢地嘅社會地位有關。基層工作,其實係社會妥善運作嘅重要機件嚟,齒輪出事都係出事,正如底板啲電容燒咗,都係可以會著唔到機一樣。西方有啲國家,修理水喉嘅人工同大學教授差唔多,唔係無原因,因為呢啲專業係一個社會妥善運作所必須。

發表迴響

你的電子郵件位址並不會被公開。 必要欄位標記為 *