AutoTrac-min

AutoTrac 3 又炒粉,大家復活節自求多福

香港啲新聞,真係沒有最黐線,只有更黐線。今日香港機場嘅 AutoTrac III 空管系統大炒粉, AutoTrac 嘅畫面上,大批飛機消失,要搞到啟動後備系統,民航處嘅指揮人員,簡直用Panic嚟形容依家嘅狀況。

AutoTrac 點應付復活節高峰期

依家至話 AutoTrac 3炒粉,簡直係噩夢,因為下個禮拜就開始放復活節長假期,應該好多人會搭飛機外出旅遊,機場要處理大量航班,依家一係 AutoTrac 3處理唔掂航班,導致大量航班延誤發生,以香港人嘅德性,香港機場一定膠到核爆,屆時地勤人員真係要多X謝機管局買個咁廢嘅系統返嚟玩大家。但更怕係,由於 AutoTrac 3嘅故障,如果有任何失誤,不幸導致空難,係任何人都玩唔起。預料復活節期間香港出現濃霧天氣,對飛機升降嚟講,一定極為依賴控制塔嘅指揮,而控制塔依家俾套咁嘅膠系統玩,我係民航處嘅專業空管人員,都會感到係Panic﹐甚至可能放咗工都會發噩夢,大佬,喺空中,對意外係零容忍。

所以民航處應該重開 AutoTrac I舊系統應付復活節嘅狀況先,至少復活節期間,機場可以可靠而安全咁運作,或者會略有delay,但唔會令到空管人員受到根本不必要嘅壓力,同埋乘客唔會去機場,或返香港果陣,驚因為 AutoTrac 3 炒粉,而有任何性命安全嘅問題。喺冬天,香港大部分時間都係晴朗嘅天氣,無 AutoTrac 3要執生都仲有啲方法,但大霧天氣,空管系統係好關鍵,如果民航處堅持要攞香港人甚至其他國家嘅人命仔靠飛,就必須有清晰嘅交代。而張炳良教授雖然只有仲有兩個月局長任期,就唔該為咗公眾利益,佢自己出嚟睇住民航處,咪俾班仆街亂嚟,因為依家嘅狀況,真係太過得人驚。

長遠嚟講, AutoTrac 3 套系統應該換咗佢,佢喺全世界,除咗同軍用系統高度整合嘅美加,幾乎無掂過。依家政府應該將空管系統重新招標,搵Thales 或 BAE Systems 做,都仲有少少道理,至少呢兩間嘅系統,暫時都未有嚴重炒粉報告。

發表迴響

你的電子郵件位址並不會被公開。 必要欄位標記為 *