究竟邊個送激進派入局?

呢幾日香港報紙,成堆評論喺度問緊,點解社民連興起得咁快,成堆激進派入咗去。特別係九西,黃毓民大勝果幾個票站,究竟係九龍塘、同埋九西海傍豪宅區果啲票站,果啲人橫睇掂睇都唔似會支持社民連。

我四年前《梁國雄現象》講咗年青人點解投咗長毛,依家睇嚟要寫下集,點解成班中產送毓民入立法局。

查實唔難理解,由X建聯到豉油黨到北京都硬膠,千方百計用埋啲硬膠方法阻礙民主,喺議會就撞板多過食飯,成日都通過啲A貨法例、硬膠政策,仲要喺副局長事件中只係分餅仔,而泛民睇嚟睇好都太斯文,唔多做到嘢,咁好簡單,一件長毛唔夠,送多件毓民,加謝偉俊日日同你倒屎。旅遊界用公司票都出到個謝偉俊出嚟,你話仲有乜唔可能?

所以驗乳勤、IT膠人、悶人波(陳茂波講嘢悶到有如音波功)、希師奶,仲有William Hung的好朋友李慧琼入到議會,只係噩夢的開始,選民授權長毛、毓民入去玩謝佢地,禮拜三立法會會議實好睇過《溏心風暴》。

(曾鈺成做立法會主席,佢夠稱控制場面先算啦,佢唔好得過我地推薦的驗乳勤太多)

7 thoughts on “究竟邊個送激進派入局?

  1. 我唔明點解啲人成日講到選毓民同長毛入議會嘅人係白痴、鍾意玩嘢,第二日實後悔咁,佢地係所屬選區第二高票數當選,就已經係一個好好證明,唔通咁多人都係白痴?若果話咁高票數當選係有問題,咁最高票數當選的 X 建聯團隊就更有問題啦,投佢地票嗰啲人就唔白痴?佢地入議會就唔會搞亂檔?X建聯入到議會做第一大黨,唔會搞亂議會,因為佢地嘅目標係搞亂香港嘛。

  2. 投X建聯或IT膠人的,我真的懷疑佢地有問題。班友咁嘅質素。

    長毛和毓民,再加上公民黨吳藹儀,三個人的學識水平係成個議會最強。聽過長毛對吳藹儀關於禁煙問題的辯論,就知乜叫高水平。

    驗乳勤?早抖啦。

  3. 昨天練乙錚在信報也都講出原因。經濟方面,貧富懸殊惡化、通脹超過收入增長、失業率高企,都會令低下階層政治意識激進化。政治方面,特區政府政治逐漸收緊,又打壓言論自由,又親疏有別,壓縮了有效的政治表達渠道和參與空間。

    我覺得在有下流社會傾向的香港,官商(大商家)勾結愈來愈嚴重,如日常民生問題如信用卡,流動電話,收費電視營銷及收費紛爭,中小企營商環境愈來愈惡劣,社會不公義之事愈來愈多,又得不到解決,大商家,政治既得利益者與廣大市民的洪溝日益擴大,這種激進化勢頭只會愈來愈明顯。

  4. 特區政府施政不得人心﹐加上官商勾結﹐小市民當然利用手中的選票來表達不滿。這
    些基本道理香港D報紙仲要花時間評論點解社民連可以獲勝﹐有無搞錯﹖

發表迴響

你的電子郵件位址並不會被公開。 必要欄位標記為 *