黃易-min

黃易 邊荒集 夜窩子 香港

雖然香港係武俠小說之都,大部分武俠小說名家,都竟然出喺香港呢個商業城市,只不過,如果真係將香港嘅本質寫入武俠小說之中,相信只有 黃易 。我本身唔好武俠小說,只不過,如果最能準確描述香港呢個城市,最能捍衛核心價值一班友,我相信得 黃易 透過邊荒集嘅夜窩子描述到出嚟。

黃易 筆下嘅夜窩子 = 高登/連登

其實邊荒集嘅設定,本身已經好接近香港嘅本質,南北兩地之間嘅要塞,而喺呢個要塞,係無分種族出身,呢個正正符合香港嘅本質。得香港只會有一大班華裔以外人士,同你講流利廣東話(即香港語文),連粗口汁都撈埋。啲人話金庸鹿鼎記嘅韋小寶係香港人,其實係醜化香港人,韋小寶簡單嚟講係一班唔講原則嘅死sales佬,無錯香港好多sales佬,但香港人唔係只得sales佬嘛。

當然,夜窩子成個設定充滿高登/連登,或香港中層至下層之間嘅膠氣息,市中心係一堆賭場同妓寨,大家平日好似成班廢青咁,沉迷聲色,不知所謂。而夜窩子嘅設定好有毒男氣息,一個紀千千可以號令成個夜窩子,當然獨派明顯需要一個類似紀千千嘅人物,如果有嘅話,恐怕連登或高登力量會加倍。但姚猛呢句對白,其實最能反映成個夜窩子嘅本質:

對我們夜窩族來說,只有邊荒內和邊荒外之分,邊荒內是自由和公義,邊荒外則只是勞役和剝削人民的暴君和只顧己身利益的獨裁者,一天有民族私利的存在,鬥爭永不會終止。凡到邊荒集者都要從噩夢裹醒過來,看清楚邊荒外所有政權的本質和真面目。我姚猛今天在這裹說出夜窩族族人的心聲,在邊荒集只有夜窩一族,當所有人均加入了夜窩族,邊荒集將變成歷史上從沒出現過的大同社會。對夜窩族來說,誰背叛邊荒集,便是叛徒,是我們夜窩族的公敵,沒有人可以例外。

上述 黃易 寫嘅對白,比起乜嘢教主,更能一矢中的講出香港本土派嘅實質,一班高登仔、連登仔,平日唔多正經,日日派膠,9up當秘笈,但大家好清醒認識到,凡認同香港呢個夜窩子,就係香港人。或者 黃易 寫嘅呢句,正正我剛才講嘅寫照

姚猛是夜窩族的頭號好漢,極得卓狂生寵信和族人愛戴,玩樂時比任何人都要瘋狂,可是面對危機亦毫不畏怯。

人人都係項少龍,似乎無乜可能,但 黃易 係屬於香港嘅,因為黃易將當代香港寫咗入去佢嘅武俠世界,金庸何曾講自由與公義?人人都係姚猛,呢個係香港人可以預期。

發表迴響

你的電子郵件位址並不會被公開。 必要欄位標記為 *