扶手梯-min

扶手梯 安全問題:公司、技師與零件監管

扶手梯 嘅安全問題越嚟越恐怖,上禮拜朗豪坊果條幾層樓高嘅 扶手梯 炒鑊甘,炒到連荷蘭佬都知之後,今日香港仔又有 扶手梯 炒粉,累幾個阿婆受傷,由於 扶手梯 係香港市民生活不可或缺嘅一部分,所以政府有責任回應 扶手梯 安全問題,應該點處理,而政府一直以嚟,都唔叫做得好。

扶手梯 炒粉明顯係監管問題

先講香港仔中心炒粉呢單嘢先,蒂森克虜伯雖然係一間德國公司,但 扶手梯 同電梯呢部分,維修水平之爛係去到全世界都不敢恭維嘅程度,好多電梯炒粉事件,都係同蒂森克虜伯公司有關,呢間嘢喺香港嘅電梯維修水平,同克虜伯集團喺軍工方面嘅卓越水平係完全唔相稱,機電署應該俾蒂森克虜伯最後警告,如果再有炒粉事件,就唔該呢間公司只係喺香港賣零件算嘞,有時政府或港鐵啲合約,都會批俾蒂森克虜伯,無錯,係價低者得,但都係應該有個譜㗎。除咗蒂森克虜伯,仲有一間叫星瑪電梯(以前LG電梯,依家係OTIS旗下),又係啲維修同屎一樣級數,政府應該順便要求呢間公司執正埋佢,否則香港好多人住埋啲單幢樓,或喺單幢商業大廈返工,實有排驚。

但除咗監管公司,監管零件同技師質素都好重要,新加坡近年壞電梯壞到好似家常便飯咁,係嚇死人到,成座組屋可以六部電梯壞鬼晒,住喺果啲組屋真係唔想問候娘親就奇,而除咗新加坡太多奇奇怪怪嘅小型電梯維修公司外,仲有係新加坡無法用好人工留住好嘅技師,呢個都係問題,師傅唔掂就真係講幾多維修都係假,點樣確立師傅嘅技能水平同薪酬水平就好關鍵,否則啲師傅一hea,電梯同 扶手梯 炒粉炒不完,真係有排你驚。

同埋,呢幾年,好多電梯同 扶手梯 零件甚至成條電梯都係中國製造,中國嘅QC水平真係大家心照,點樣可以迫電梯製造商或代用部件製造商,生產合符安全規格嘅零件,呢一點,又真係要諗吓,汽車大家知規管唔可以講笑,但電梯似乎太多人掉以輕心。

後話:黃之鋒竟然係第一個到場視察嘅政客,並且一開口就講到間電梯營辦商有四次炒粉紀錄,泛民議員嘅勤力度,應該向佢學習。(可惜,黃之鋒並唔係國會議員)

發表迴響

你的電子郵件位址並不會被公開。 必要欄位標記為 *