劉江華-篤數

劉江華 用篤數文化慶「回歸」

親共議員張華峰,喺早上嘅立法會財委會特別會議上,質疑 劉江華 排入去好多慶回歸活動,好多都同慶回歸無關,連清潔香港都計入去,懷疑 劉江華 係篤數。張華峰真係太唔了解共產黨, 劉江華 咁樣篤數,其實係「真正回歸」中國嘅做法嚟。

劉江華 繼承篤數嘅偉大共產黨傳統

中共官員篤數以下暪上,根本係中共一貫傳統,點解中共果啲統計數字咁鬼多水分,因為中共係玩一級級咁篤數嘅遊戲,地方縣級芝麻官,可以係篤大概50% 跟住市級啲官因政治需要,又篤大概50%,咁一級級篤上去,啲數字水分就多到離晒譜,所以至有大躍進造成嘅大饑荒災難。所以一直以嚟,無乜人信中國啲統計數字,或者啲統計數字全部要自己下調50%,就係呢場官場文化嘅結果,特別共產黨無輿論監督,所有傳媒都淪為宣傳機器嘅情況下,無人主動篤爆啲數,就更加要小心。

張華峰可能係金融人,慣咗啲嘢要相對清楚,唔知共產黨下嘅官僚,就係 劉江華 果種做法。其實呢個係一個危險訊號,反映喺何志平、曾德成同 劉江華 三個老共嘅心腹管治之後,成個民政事務局嘅運作變得共產黨化,茶果嶺火災災民被趕事件只不過冰山一角,實際上,只有最邪惡無惡不作,作風共黨化果啲官員至有可能晉升,民政事務局好可能係警察之後第二個淪陷嘅部門。只不過張華峰呢條友懵盛盛,自己踢爆咗共產黨唔想大家知嘅真相,都懵然不知。

共產黨先赤化民政事務局,其實亦係正常安排,因為喺共產黨眼中,入境處、警隊同民政事務局,係英國統治香港嘅三大法寶,由維穩嘅角度睇,先將三個部門逐一赤化,亦都順理成章。但對一般市民嚟講,民政事務局最難睇到赤化,因為好多嘢都係不知不覺嘅檯底運作,如果唔細心用放大鏡睇,根本唔知有人玩緊嘢。

不過中共玩心戰,仍然係蘇聯同大清帝國粗野果套,新加坡人民行動黨上台後,為咗抗衡被馬共控制住嘅人民行動黨黨支部,另組人民協會,當然人民協會嘅宗旨仍然係蛇齋餅粽,但唔會好似香港嘅民政事務局咁嚴重內部腐化。中共控制嘅馬共玩唔過李光耀,當年馬共內部嘅中共作風,真係應記一功。

發表迴響

你的電子郵件位址並不會被公開。 必要欄位標記為 *