TSA-中聯辦-min

教育局有必要交代點解仲要堅持 TSA

我一早篤爆咗,教育局堅持 TSA ,好大機會因為中聯辦喺三中商嘅龐大利益有關。依家果然有傳媒跟進,根據《壹週刊》嘅報導, TSA 習作衍生嘅生意,涉及由中聯辦直接控制嘅聯合出版集團兩億元嘅商業利益,為咗張曉明,犧牲咗小學生嘅童年。

明確指控在前,教育局必須交代 TSA 存在理由

其實包括小弟在內嘅人,係咁對教育局堅持 TSA 背後有無三中商利益牽涉其中有所懷疑,因為教育局堅持 TSA 嘅理由,根本唔係理由嚟,既然下屆政府已經明確要求取消 TSA ,雖然保留 TSA 係現屆政府嘅事權,但繼續保留 TSA 嘅理由 ,包括政策延續性,以及個政策消失之後,數據嘅運用,係必須向公眾交代。依家係變咗為考 TSA 而考 TSA ,任何人都會對當中有無利益關係有所懷疑喇。所以,教育局吳克儉,一定要向公眾交代依家發生緊乜事,否則公眾下一步,可能係將 TSA 問題提交廉署處理,因為呢件事已經懷疑係公眾人員行為失當,呢條普通法罪行,應該可以用嚟將張曉明同吳克儉落鑊俾廉署查。

呢次,我都要感謝《壹週刊》同城寨肯跟進呢單嘢,但香港其他傳媒喺呢件事上去咗邊?點解可以任由中聯辦攞家長嘅錢,殘害細路嘅童年?唔通要我實名向中紀委舉報,再等中紀委巡視組班友唔知會唔會主持公道,至可以叫停 TSA 。如果香港傳媒係咁炒熱 TSA 嘅議題,我唔信梁振英同吳克儉仲敢堅持已見,佢地敢,張曉明都未必敢喇。依家點解咁多人對傳媒失望,因為喺呢啲民生攸關嘅議題,由東江水嘅水價問題,到中聯辦涉嫌喺 TSA 上掠水,傳媒都係失職,未有盡責任,當傳媒都無踢爆呢啲嘢果陣,點解香港人仲要俾錢你呢啲傳媒?喺香港嘅現況,香港人期望唔係只係一啲堅離地嘅「深度報導」,而係喺民生問題上,對權貴任意濫權嘅揭露,停止權貴再利用不公政策殘害市民。但依家香港啲傳媒,好多都唔知靠乜嘢經費嚟維持,由中聯辦控制嘅廣告預算,到來歷不明嘅資金都有,當出現呢個情況果陣,公民調查報導,好可能係最終監察社會嘅出路。相關嘅技術安排,我希望遲吓可以同大家講吓。

發表迴響

你的電子郵件位址並不會被公開。 必要欄位標記為 *