端傳媒-min

端傳媒 之死

端傳媒 今日開員工大會,宣布大舉炒人,一炒炒大半員工,剩番廿幾人, 端傳媒 作為一個離地到爆嘅網媒,今日至話準備throw the white towel,其實叫做遲。

端傳媒 資金背景不明,花費過鉅

端傳媒 一開始已經惹起我嘅懷疑,因為 端傳媒 嘅資金背景不明,由中國海歸派人士搞嘅媒體,你認為無政治任務,真係呃鬼食豆腐,都唔係咁呃喇。所以我私人戶口都唔share 端傳媒 嘅嘢,因為佢同香港01一樣係資金來歷不明,呢啲有可疑嘅傳媒,就無share嘅空間可言,我相信好多人,都係採用同我一樣嘅態度嚟看待 端傳媒 ,所以 端傳媒 本來喺香港市場就難立足,更加唔好講統獨對抗更強,手機網絡環境更差嘅台灣。至於中國,算吧,你叫人翻牆睇 端傳媒 ,你講笑搵第二樣喇。

另一方面,花費過鉅都係問題,好似我呢度,我呢度最大嘅花費,就係我本人嘅生活費,就係咁多,所以我搏命寫,再加開拓唔同嘅收入來源,我唔會餓死,當然如果我想搞大啲嘅project,就要再諗擴展恆常讀者群,至好搞呢樣嘢(我都想搞個網媒,但我做法極度保守,技術果面都未驗證完,更加唔好講business model,所以我最大嘅時間仍然用喺呢度)。 端傳媒 一開始就請成九十幾個員工,仲未計辦公室租金,咁龐大嘅經費,我想問題要拉到幾多廣告至可以break even,都唔好講搵到大錢,加上 端傳媒 嘅背景相當不明,基本上唔可以搵到任何捐款,咁你話 端傳媒 唔會死, 端傳媒 唔死係無天理,因為成個商業模式係一啲合理性都無。

其實我唔明點解香港人總係要搞啲大堆頭,Huffington Post模式嘅網媒,當然,我相信大家係需要一個聚合點,但成個cost structure一定要搞得好清楚,否則只係投資一大堆冤枉錢而唔知為乜,亦唔知睇咗啲乜。當然,喺香港01同 端傳媒 都開始要叫救命果陣,其實大家知道特首選舉後,呢啲網站都任務完結,跟住又唔知乜嘢星球爆出嚟嘅人,又搞另一堆網媒出嚟,搞亂個局,生生不息。我依家比較清醒,我搞掂我自己先。

One thought on “端傳媒 之死

  1. 其實依家網絡發達,乜鬼野都可以自己攪惦啦。以前祇有電視台有財經直播,今日係FB我起碼見過5,6檔。雖然未必好多人睇,但計成本效益分分鐘赢CCTVB。黄生你有無諗過做FB LIVE? 你個網如果可以多做一些獨家新聞(如踢爆林鄭居留權單case),成功將離你不遠矣!請你繼續努力。

發表迴響

你的電子郵件位址並不會被公開。 必要欄位標記為 *