英國人-min

感謝 英國人 – 只係尊重歷史

如果講唔駛感謝 英國人 ,嚴格嚟講,新加坡人比起香港人更有資格講呢句,因為1942年新加坡之戰,英軍庶近不戰而降,同香港保衛戰裡面,英軍搏晒命打到一兵一卒,庶近一個英軍換一個日軍嘅戰績好唔同。但新加坡人無講港英只係一舊屎,相反,新加坡政府喺萊佛士登陸河口豎立萊佛士像,並且同時以英、華、馬、淡(淡米爾)四國語文書寫,感謝萊佛士建立新加坡,而豎立呢個像,唔係海峽殖民地政府,而係1970年代嘅新加坡共和國政府。南洋人,對 英國人 建立新加坡嘅貢獻,仍然感激。甚至,某程度上,新加坡仍然以英國為模範,真正獨裁國家,係唔會用自己嘅FM頻譜廣播英國廣播公司節目,但新加坡係英國本土以外,唯一用FM廣播英國廣播公司節目嘅國家。

感謝 英國人 係尊重歷史

當然用歷史放大鏡嚟睇, 英國人 喺新加坡同馬來西亞嘅政策,有更多可供批評之處,否則唔會搞出新馬分家呢個大頭佛,但南洋人視野,唔會只係睇自己呢個城市,南洋華人喺南洋諸國四處游走係好正常,比較過荷蘭、法國、美國嘅表現,以及好多所謂殖民地獨立後,沒有最膠,只有更膠嘅狀況, 英國人 喺部分英國本土以及澳洲嘅制度成功移植後至獨立,包括Council House (組屋),議會民主制度,強制投票同秘密投票制等,如果無 英國人 ,李光耀係天才都未必可以抵擋中共來犯,以及馬來人果啲派膠無極限嘅行為。所以,作為一個經常批評 BNO 搞歧視嘅人,我反而唔會話港英只係一舊屎,因為如果港英真係一舊屎,根本唔會有今日嘅香港。正如如果無 英國人 留低嘅一切,新加坡根本唔可能係南洋最富裕嘅國家之一,甚至某程度上,今日嘅新加坡,係英聯邦國家裡面,地位同澳洲、加拿大等國相若嘅大哥嚟。

所以熱普城啲垃圾唔可以睇得太多,要搞本土,要搞真係有前途嘅建國,不單要讀世界歷史,更要放眼世界。黃毓民、黃洋達呢啲假本土論述,無世界歷史基礎,以及一味民粹自衛就可以建國,呢個世界邊有咁容易㗎,至少建國,係唔可以,亦唔應該否定英國呢個前宗主國。

發表迴響

你的電子郵件位址並不會被公開。 必要欄位標記為 *