張建宗-min

張建宗 變咗林鄭月娥嘅燙手山芋

林鄭月娥上台以嚟,好多唔係問題嘅問題,都變咗係問題。好似政務司司長應唔應該由 張建宗 繼續做落去,就變咗一個雞肋式嘅問題,呢個好考林鄭月娥嘅政治智慧。

張建宗 係政壇雞肋

如果用食之無味,棄之可惜嚟形容 張建宗 嘅政治位置,都應該係一個幾準確嘅描述。如果話 張建宗 好有民望,以呢個人嘅平庸程度,我估一百年都唔會做到高民望,佢只不過係一個好忠實執行命令嘅政務主任,甚至譚志源嘅能力都會比 張建宗 嚟得高。但你話炒咗佢,或燉佢冬菇,咁林鄭月娥換個乜人上嚟做政務司司長先?搵張雲正,左睇右睇,張雲正同 張建宗 又差唔多,搞得唔好,張雲正比 張建宗 更仆街,如果照lesser evil, 張建宗 係唔係一個適合嘅政務司司長人選,真係一個好令人疑惑嘅問題。

如果曾俊華當選,其實政務司司長人選唔駛太擔心,因為相信政府內部好多叻人肯做,炒咗張建宗無乜大問題。其實 張建宗 本來應該一直署任就算,但梁振英唔知點解,安排佢一開始就坐正,佢又唔係林瑞麟果隻,因為佢本來就係臭名遠播嘅公公,所以大家覺得佢坐幾個月被人炒咗都唔係太可惜嘅一件事嚟。陳茂波其實大致上,都係林瑞麟果類型,所以佢被林鄭月娥炒咗,踢出財政司司長官邸,大家都覺得佢抵死。但 張建宗 ,有無一個要佢一定要死嘅理由,又睇唔到。

要為炒咗 張建宗 呢件事合理化,除咗要有具體罪名,令公眾覺得呢條友同林瑞麟、陳茂波一樣抵死外,仲要新嘅政務司司長嘅人選,要係一個能幹而好叻嘅人,由曾蔭權爵士以嚟,之後啲政務司司長,包括林鄭月娥在內,都唔係有乜好表現,談唔上有乜嘢工作能力,同陳方安生、曾蔭權呢啲爭好遠,更加唔好講英治年代果啲。點解曾俊華有咁高民望,因大家對曾俊華能力期望係陳方安生、曾蔭權呢啲級數,但以林鄭月娥嘅為人,又點可能搵到一個高level嘅人做政務司司長呢,特別如果政務司司長太叻,隨時會影響佢自己連任之路。佢自己應該好清楚,佢自己係點樣入主港督府至得架。所以林鄭月娥嘅政治水平係點, 張建宗 將會點處理就見真章。

發表迴響

你的電子郵件位址並不會被公開。 必要欄位標記為 *