葉劉淑儀-彭仕敦-min

葉劉淑儀 借彭仕敦隻手起北京飛腳

葉劉淑儀 喺上個禮拜日嘅特首選舉話支持林鄭月娥,大家以為佢無用走去投降果陣, 葉劉淑儀 競選辦公室嘅總新聞主任彭仕敦,竟然喺親泛民嘅英文網媒Hong Kong Free Press發功,直接指中聯辦操縱選舉,雖然彭仕敦喺Hong KOng free press用自己嘅facebook account戴頭盔,話佢自己嘅意見,唔代表 葉劉淑儀 嘅意見,但以彭仕敦過往幫過梁振英嘅背景,唔係 葉劉淑儀 授意你咁做,你都唔敢咁勇直接開中聯辦拖。

葉劉淑儀 又被中聯辦走數?

葉劉淑儀 由本來支持曾俊華(其實佢都幾真心去認為曾俊華表現好,加上曾俊華有紀律部隊淵源,反而林鄭月娥無紀律部隊淵源),轉到支持林鄭月娥,都相信係權力分配上,新民黨係有一定得益至咁做,畢竟新民黨係直選搵食政黨,中聯辦要資助,都係幫咗民建聯、工聯會,甚至梁美芬之流果啲「親生仔」先。中聯辦應該答應咗 葉劉淑儀 唔少嘢,但依家林鄭月娥似乎唔係好想兌現,咁咪搵個洋人出手篤爆件事。雖然果位洋人有機會已經歸化中國國籍,但洋人要恢復原先嘅國籍相對容易,篤爆咗件事,最多話係洋人性格同華人唔同,唔識華人潛規則,然後自此喺香港消失了事。彭仕敦扮演呢種角色,本來就十分之合適。

不過, 葉劉淑儀 咁做,其實 葉劉淑儀 自己都唔駛旨意留喺香港,坦白講,因為彭仕敦用英文寫文,直接指北京違反《中英聯合聲明》,呢篇文用英文寫,而且係一個曾經服務英國同中國兩個政府,投過共嘅前官員寫,會視為可信性十分高,呢份嘢對北京嚟講,根本係核彈,依家話中國走咗《中英聯合聲明》條數,呢啲證據真係水洗都唔清,連投咗共嘅洋人都要咁寫爆你,你中國政府仲想點反駁?呢篇文俾英國國會議員睇,例如啱啱喺泰晤士報寫咗長篇文章鬧英國政府走香港人數嘅工黨國會議員Catherine West MP睇,跟住我真係想知英國政府仲可以點樣回應,係唔係要彭仕敦過英國倫敦喺國會面前作證咁樣?

葉劉淑儀 呢次借彭仕敦隻手起北京飛腳,真係花生無限,張曉明自己慢慢同習近平解釋一吓發生咗乜事喇。

發表迴響

你的電子郵件位址並不會被公開。 必要欄位標記為 *