柯文哲-香港-min

柯文哲 諗唔通嘅問題:如何行銷台灣

柯文哲 較早前質疑,點解香港咁無聊,都有成堆人嚟玩。 柯文哲 嘅講嘢方法,我好明白,香港呢幾年俾班旅遊界垃圾搞到無乜嘢玩,仍然有一堆人嚟(南韓人近日好多),呢個問題,或者好多台灣人都同樣大惑不解,甚至香港人都係。

其實呢個問題唔難解,英國人留低嘅兩大遺產,包括香港同荷里活嘅密切聯繫,以及同英語系國家嘅關係,就係香港旅客長期能夠維持嘅因素。

柯文哲 同好多綠營中人嘅盲點

如果一般香港人去講呢啲嘢,一定俾人鬧爆,但我作為一個都好明顯係亞斯伯格症患者,加上長期作為台灣綠營盟友嘅人,我用香港經驗,希望幫番台灣人。台灣以往電影工業不振,其實喺行銷台灣旅遊上好輸蝕,香港係一個加大碼嘅主題公園,其實無點死錯人,因為好多電影嘅場景,就係香港本身,由邵氏啲爛片(邵氏片係一種奇怪嘅事,明日有機會可以仔細講)、現代功夫片、張國榮嘅遺跡,甚至攻殻機動隊果個新港市,根本就係香港嚟,山道天橋可以講係所有科幻片對未來社會想像嘅始祖。英治年代給予香港極大言論自由,令香港嘅電影工業喺遠東係獨一無二,光係呢樣遺產就夠香港人食一段日子。我見好多南韓遊客嚟香港,其實就係追尋吳宇森電影果個香港想像,吳宇森英雄電影,正正係今日南韓電影其中一個好重要學習對象。如果台灣唔搞掂自己嘅電影工業,電視劇仲係拍一大堆爛到無朋友嘅果啲鄉土劇出嚟,我可以講,台灣旅遊好難超越香港,縱使台灣有好山好水,畢竟電影至係超越語言文化。香港電視劇呢幾年俾台灣人控制嘅CCTVB搞到不知所謂都好,大家睇HKTV,同ViuTV嘅瑪嘉烈與大衛之綠豆,香港要追番國際水平,其實好快。

另一方面,英國人長期對香港嘅統治,令香港人對英語系以及日語國家行銷香港好有一手,簡單嚟講,如果唔係自由行令香港旅遊界懶晒,其實香港人好知要對鬼佬sell乜,對日本人又sell乜,鬼佬可以有成批人去深水埗添好運「朝聖」,當然同紐約都有添好運有關,但點心呢樣嘢,香港人sell俾日本人同西方洋人從未輸過,台灣嘅飲食又可以點樣向日本同西方國家行銷,呢樣嘢一直以嚟,其實台灣係打唔開局面。

台灣政府或者搵幾個熱愛台灣文化嘅香港人,作為台灣旅遊行銷嘅顧問,係一個好嘅方法。香港人真係無幾樣真係叻,但講sell嘢,做sales,香港人真係仍然係亞洲數一數二。

發表迴響

你的電子郵件位址並不會被公開。 必要欄位標記為 *