選民登記-假身份證-min

選民登記 洩漏與騙案

裝住全港 選民登記 資料嘅手提電腦失竊之後,政府嘅態度仲要係懶懶閒,但如果大家無失憶,知道舊年幾單唔同嘅騙案之後,其實 選民登記 洩漏事件造成嘅負面影響極大,搞到香港身份證認受性歸零,同全香港人必須用passport嚟做身份認證都仲得。

選民登記 洩漏風險政府唔講

無錯,啲騙徒唔可以單憑你身份證同地址資料玩嘢,只不過,騙徒用你身份證同地址資料去申請另一間銀行嘅戶口,再用嚟洗黑錢,跟住某日早上,你突然被人上門拉咗,跟住話罪名係你洗黑錢,然後再對銀行資料,發現你嘅資料因為 選民登記 事件洩漏咗出去,被人用嚟做黑錢車手資料,你已經死得。政府同警方,無理由唔同公眾講呢個風險,雖然依家要開銀行戶口都唔容易,但個人戶口仍然係相對易開。

但更大問題係冒認你身份,再賣咗你層樓,去年已經查出類似嘅手法,捉過人,政府無理由當公眾失憶失成咁嘛,既然有人曾經偽造身份證,意圖賣咗受害人層樓,然後呃訂金,咁好多選民都係業主嚟,豈不是佢地自己層樓咪好危險,甚至可能引發好多層出不窮嘅產權糾紛,喺香港政府無一個網上身份證核證系統之前,依家咁樣大規模 選民登記 洩漏,其實後果係好嚴重,好多中產選區嘅選民,特別用個人身份註冊層樓業權果啲,依家仲唔震過貓王?依家樓市咁貴,講真,真係呃你個細訂都已經和味過和味龍,我可以肯定,匪徒攞咗部機後,一定重金禮聘俄國黑客爆晒 選民登記 內容然後做世界,甚至只要有人喺dark web,竟然發覺有呢啲紀錄賣,大家已經可以有心理準備,香港樓市嘅交投一定會大亂,因為齋喺核實買賣雙方果度已經會好煩,好可能大家要攞住外國護照對身份,因為最安全。

就算政府有系統俾人核證身份證資料,都要小心行事,因為香港好多人係無Smartcard reader,好似我呢啲人,有Smartcard Reader已經少,而且政府隨時個reader只係支援IE,屆時本身都係一個保安風險,大家都知IE係一個幾牙煙嘅瀏覽器至得架,總之依家只係災難嘅開始,遠未到結束。

One thought on “選民登記 洩漏與騙案

  1. 其實,現時應該大家一齊去私隱專員投訴/控告香港政府選舉事務署失職,甚至要求賠償(即使係每人一蚊都好)。

發表迴響

你的電子郵件位址並不會被公開。 必要欄位標記為 *