BREXiT-無回頭路-min

BREXIT 再無回頭路

我國首相 Theresa May 簽署咗啟動《里斯本條約》第50條嘅信函,由今日起計兩年後,無論歐盟同我國政府談判結果如何, BREXIT is BREXIT ,再無回頭路。或者有可能係,我國解體,再無回頭路。

BREXIT 愚蠢喺邊

當然,喺香港人角度,香港或者係 BREXIT 贏家,呢個或容日後進一步分析 IA 1971 嘅paywall文分析,同埋果啲唔應該有權留喺英國嘅親共馬交人,可以被趕出我國國土,我都心涼。只不過,以我國整體利益而言, BREXIT 結果好大機會就係我國解體,因為北愛嘅和平、蘇格蘭嘅經濟同發展,甚至威爾蘭嘅經濟同發展,以及直布羅陀唔會被西班牙吞併,呢一切一切,其實都係因為有歐盟單一市場作為保障,英格蘭鄉郊嘅人視野狹隘,睇唔到依家喺no plan情況下貿然 BREXIT 嘅結果。

其實,呢個亦反映咗,喺帝國解體嘅同時,我國國民國際視野,以至國事判斷能力日下嘅問題。小弟一直係英國保守黨員,有一次我同個居港英國人傾偈,佢對我作為保守黨好驚訝,因為喺佢眼中,依家好多保守黨嘅作為,同埋政策主張,同民建聯係無分別。當然,呢位英國人係一名左膠,所以佢對保守黨有佢嘅厭惡。但作為保守黨員,我都不得不承認,其實依家堅持硬過 no plan BREXIT ,除咗取悅一啲貪一時之快嘅選民,究竟長遠係唔係對聯合王國本身係一件好事。仲要上世紀七十年代,其實堅持唔係歐共體果個係工黨,而支持入歐共體係保守黨。依家搞到係工黨變咗當年嘅保守黨,但依家保守黨嘅一啲作風,就越嚟越有工人階級政黨嘅風味,而由一班咁嘅人,不顧後果作出嘅決定,係唔係一個好嘅決定,呢一點,我真係好有保留,否則我都唔會考慮緊,會唔會加入蘇格蘭民族黨,以及一旦聯合王國解體,我選擇做Scottish,而唔係British,話雖我好多嘢,都仲係同倫敦黐埋。(至少我嘅電視牌照,係喺大倫敦地區)

未來兩年,我國展開驚濤骸浪嘅 BREXIT 過程,仲要與此同時,香港亦進入充滿變數嘅時期,天祐大家。

One thought on “BREXIT 再無回頭路

  1. 世澤兄:

    部分同意啦, 但唔使咁悲觀睇英國嘅, 英國產品同服務, 歐盟始終需要, 反之亦然, 加關稅就大家無著數, 呢步雙方都唔輕易做得出.

    至於蘇格蘭要獨立, 好大程度係擔心蘇格蘭人過唔到歐陸搵食, 同樣道理, 對人加關卡大家都可以做, 做就大家無著數, 呢步雙方亦都唔輕易做得出, 人地打你, 點解你唔可以還拖? 該出手時要出手.

    所以要做好個分手談判, 但談判我又唔會悲觀, 唔好誤會, 我唔係一個吹捧仇恨嘅人, 事實上家陣, 亦唔見得英國同歐盟有乜深仇大恨, 只係歐盟係都要當英國臭四啫, 咁英國咪拍檯走人囉, 國民國際視野以至國事判斷能力低下, 部分青少年就的確係, 整體來講就唔係. 談判係有可能成功, 成功的話蘇格蘭唔使獨立.

    談判唔成功又點話? 蘇格蘭經濟, 目前計, 其實靠英格蘭多過靠歐陸好多, 獨立後點計? 唔使計? 聽天由命? 歐盟老奉比獨立後蘇格蘭入? 入唔到又點?

    我可以家陣就睇到, 獨立後蘇格蘭入到歐盟就食得屎, 喺歐盟眾多大佬面前, 面精心懞嘅施雅晴算老幾?

    獨立後蘇格蘭入唔到歐盟呢? 咁起碼都要制訂自己貨幣, 有排攪就一定.

    世澤兄, 我天馬行空咁想一下, 文化相近, 蘇格蘭脫英入愛又得唔得? 願聽高見. 🙂

    至於威爾斯, 已知留英, 唔會脫. 北愛就難講, 可能會入愛, 但家陣, 愛爾蘭政策, 北愛人都差唔多實際入愛, 北愛人點解要非脫英不可?

    BREXIT 過程唔會驚濤骸浪, BREXIT 後嘅英國就可能會, 但我睇呢個問題有得解, 而且明顯有得解, 唔使太悲觀.

    今日 UK, 來自曾經雄飛海上, 飽歴風霜嘅大英帝國, 今帝國遠去, 而人心仍在, BREXIT 後, 面對驚濤骸浪, 再次雄飛仍大有可能.

    天祐大家.

發表迴響

你的電子郵件位址並不會被公開。 必要欄位標記為 *