選舉事務處-電腦-min

選舉事務處 搞出全香港有史以嚟最大規模私隱洩漏事件

選舉事務處 證實,一部載有全香港選民資料嘅手提電腦,以及另一部載有全部選委資料嘅手提電腦失竊,喺亞洲博覽館遺失,依家未知部嘢嘅去向,如果 選舉事務處 搵唔番部嘢,呢單嘢將會係香港有史以嚟最大規模嘅私隱洩漏事件。但呢件事,有唔少疑問, 選舉事務處 必須澄清,否則市民一定覺得件事係有陰謀過鄭子誠出現嘅任何場合。

選舉事務處 搞出乜X檔案

首先,如果呢兩部電腦落入歹徒手上,將會係全香港選民嘅身份證資料,以及地址都落入歹徒手中,真係想做假咭、假身份話咁易,呢個係史無前例嘅保安危機, 選舉事務處 所以要交代一大堆問題,而除咗警方,私隱專員都應該要介入調查,查番究竟依家香港出咗乜事。仲要起番果兩部電腦係無用,因為只要歹徒將電腦裡面嘅資料複製,傷害就已經構成。所以呢件事,實係全香港有史以嚟最大規模私隱洩漏事件。而我想知問題包括:

  1. 果兩部電腦點解喺亞洲博覽館出現,有乜用途?
  2. 果兩部電腦,作業系統層面以及登入層面有乜保安措施
  3. 果兩部電腦,有無安裝任何GPS Tag,以利追查下落
  4. 幾時發現部機唔見咗
  5. 點解全香港選民嘅資料,會出現喺其中一部手提電腦度
  6. 部手提電腦,應由邊個保管?
  7. 如果真係資料落入歹徒手中,有無遙控毀滅資料機制?
  8. 呢啲資料,有無任何涉及記錄選民意向嘅文件?
  9. 資料落入歹徒手上,如果市民有損失,邊個賠償?點賠?

呢件事,真係只能用荒天下之大謬嚟形容,當然,選民登記資料咁敏感嘅嘢,如果真係要喺後備投票站之用,咁可以點做,呢個政府同保安專家,可以再作出討論,但呢次咁都可以唔見,證明 選舉事務處 一貫以嚟嘅做法,出現極嚴重嘅保安漏洞,其實立法會選舉果陣,啲選票交由票站主任帶返屋企保管,已經極之無透明度,而且好容易搞出一啲奇怪保安問題。而呢啲有全港市民資料嘅電腦,裡面嘅保安安排,以及可以由邊啲人可以保管,政府應該向立法會作出詳細交代,呢件事真係反映依家政府禮崩樂壞到失控,fail程度已經向比利時進發,唔知幾時會fail到食人族嘅級數,乜膠都可以發生。

發表迴響

你的電子郵件位址並不會被公開。 必要欄位標記為 *