屌票-min

屌票 : 廢票嘅藝術

今次特首選舉最令人目瞪口呆嘅一幕,係一張大大隻粗口字屌字寫喺張票度,你話立法會或區議會選舉,經常有人派膠去 屌票 ,只不過依家係選委選舉,公然 屌票 ,仲要電視直播 屌票 ,反映有選委對呢次小圈子選舉好憤怒。如果廢票係咁投,係一兩張,我個人唔反對呢個款嘅廢票。

屌票 係一種行為藝術

比起果啲白票黨, 屌票 如果無人睇,梗係同一般白票或廢票無分別,但由於呢次選舉由於啲票得果千幾張,白票照例唔會喺電視上展示,但廢票會,所以如果堅要投廢票抗議,唔該你班友有創意啲,至少大家會討論呢張票。如果用番傳統左膠果啲手法,真係太沉,一啲討論價值都無。相反,大大隻字屌字,堅係 屌票 ,唔係上網撩事鬥非,咁樣真係會引發話題,而且仲可能累及全港所有電視台都要被通訊辦罰款(大佬,播粗口字無打格呀,雖然通訊辦可以唔罰嘅),所以咁多張廢票中,得一個 屌 字可以引發成個香港廣泛討論。再加上今次選舉結果,林鄭月娥嘅嘅得票數字都係粗口嚟,啱啱好柒柒柒,陰差陽錯下極之貼題,所以呢張 屌票 成為咗經典。

如果真係要投廢票,唔想策略投票, ok fine,原則,首先你班友唔好再做議員先。另一方面,你張票一定要發揮到抗議效果,呢啲係法國式抗議智慧。雖然夠薑寫個大大個屌字,都應該係班上慣高登同連登果幾位選委所為(邊幾位選委可能做到,其實對字跡就知,因為香港近年學生會選舉,會有啲上慣高登嘅友仔,堅 屌票 俾你睇,真係令人大開眼界),左膠之所以係膠,就係除咗佔領道德喜馬拉雅山外,連抗議嘅信息同實效都唔講,如果你認為屌係粗口唔緊要,但要訊息清楚而創新,令你投嘅一票,同其他投曾俊華嘅票有類近突顯小圈子選舉嘅荒謬嘅作用,否則選民授權你班友走去做選委,都唔知為乜春,選民授權你班友走去擊落米格機呀,黐線喇。

香港左膠最大問題係,又唔係左,亦唔係大愛,更加無膠力,同神聖羅馬帝國一樣,既非神聖,亦非羅馬,只係一堆唔知乜嚟嘅道德高地愛好者,鍾意東指西指,大家以為佢地好正義,事實佢地只係想滿足自己。要滿足自己,返去自己間房對住個Mon算吧。

發表迴響

你的電子郵件位址並不會被公開。 必要欄位標記為 *