曾俊華-敗選-min

曾俊華 敗選之後

曾俊華 敗選咗。由今日凌晨四點半我喺灣仔會展門口排到到依家,我已經工作十二個鐘,除咗我呢度嘅文,仲有蘋果日報嘅文,已經喺即時新聞見咗。我單刀匹馬,真係要抖一抖。只不過, 曾俊華 敗選之後嘅世界,我都係要討論一下。

曾俊華 完成咗民主派未曾完成嘅任務

民主派一直以嚟,參與小圈子選舉嘅戰略合理性,除咗避免不戰而勝之外,仲要證明呢個制度係荒謬,但泛民一直以嚟,政治光譜入唔到淺藍地區,所以一直都未能達到目標。但呢次, 曾俊華 係超額完成,佢以超高民望落選,所以大家聽到記者會,好多記者都問係唔係因為有人打茅波,無論 曾俊華 講乜嘢客套說話都好,大家都好清楚,呢個選舉制度只係圖利少數人嘅制度,係非推冧佢不可。係好多中間派同淺藍嘅人改變睇法,呢個至係戰略關鍵,但呢個戰略關鍵,係只能做,唔可以事前見。梁國雄係見到呢個戰略合理性,所以立即向策略派道歉,道歉係遲,但仍然可敬。只不過,其他左膠堅拒認錯,絕不反省,傲慢程度同柒柒柒一樣,選民未必會對梁國雄秋後算賬,畢竟佢肯承認戰略判斷失誤,但其他死唔認錯嘅左膠,就完全另計,我相信下屆立法會選舉,如果香港唔陷入大亂嘅話,呢班自決派好可能喺今年就一鋪清袋,選民係難以容忍沽名賣直嘅蠢才。

好多薯粉想話要移民,呢批係中年果班,佢地有條件去實現,但唔係年青果批,好多年青人連BNO都無,呢股憤怒嘅困獸鬥力量,我唔會低估,所以我喺蘋果日報至特別講到由皇族內閣到辛亥革命,其實短短五個月時間,就惡化到大清帝國瓦解,連自己嘅地方都保唔住,香港好快就七一遊行,加上林鄭月娥嘅柒力係非一般嘅柒,未有柒柒柒票都已經有大堆柒事發生咗,所以我想提醒各位,局勢有可能惡化得遠比大家預計得快,惡化得慢係運氣,但必須對惡化得快有準備。

至於曾俊華好唔好參與新界東或九龍西補選,九龍西係唔啱薯片打,留番俾青年新政或民主黨吧。新界東都好,都係果句,做Regina 2.0係唔好玩,曾俊華可以利用facebook基礎維持政治溫度,因為唔知幾時有用,但選議員呢樣嘢,都係唔好咁費心神。

發表迴響

你的電子郵件位址並不會被公開。 必要欄位標記為 *