柒柒柒

柒柒柒 特首林鄭月娥

林鄭月娥喺燒山嘅燈力加持下,以 柒柒柒 票當選特首,呢個票數當選,真係笑咗。在場香港人固然笑死咗,而啲外國記者知道 柒 字喺香港語文嘅確切意思後,都笑死咗。因為林鄭月娥嘅下場,真係可能一如票數所揭示,就係 柒柒柒 。

林鄭月娥日後將會點變成 柒柒柒

林鄭月娥點變成 柒柒柒 ,其實大家好易估到,由林鄭月娥由今年一月到依家厚過電話簿嘅柒事紀錄,大家都可以好肯定,呢條友嘅堅離地行為,政府每日充斥大量柒到無朋友嘅笑話,呢個都幾肯定,對我嚟講,出現一個 柒柒柒 特首唔係壞事嚟嘅,至少我呢度真係唔憂無話題,反而曾俊華當選嘅話,我雖然係以薯粉姿態出現,但實際上,曾俊華太正常,我真係可以唔寫juicy政治嘢,要改寫番SEO技術嘢至得。

另一方面,由過去兩個月林鄭月娥嘅用人能力嚟睇,林鄭月娥另一個 柒柒柒 嘅位,將會係佢嘅人事安排,一大堆梁粉爭位唔駛講,跟住林鄭月娥管唔住啲人,或者唔識用人,用晒啲柒頭入政府,跟住呢個政府真係好難同個柒字脫離關係。而北京最慘係要死頂,唔能夠做做吓就換咗林鄭月娥,因為咁樣就承認咗自己係柒頭,要叫共產黨人認自己係柒頭係好難嘅一件事,如果共產黨肯認自己柒,中國政治就唔會搞成咁。善治同善政,某程度都建基於人承認自己係膠同柒至得。

而且依家林鄭月娥上台並唔穩陣,我相信會有一堆DQ官司等緊佢,特別居歐權問題,我留名食花生睇北京點拆。喺法律上,林鄭月娥或者過到關,但中國啲民族主義者真係會接受一個可以隨時居住喺歐洲,隨時可以恢復英國國籍,中國政府乜事都唔知嘅人做特首?仲要呢條友依家故宮單嘢,隨時係一單告得上嘅弊案,小弟有做建築嘅朋友同我講,西九故宮呢類project一定要公開招標,一係搵貝聿銘嘅級數做,一係搞場大比賽俾年青新進上位,呢個係西九故宮一類博物館嘅設計嘅不成文規矩,如果廉署成功落林鄭月娥鑊,屆時北京真係唔慌唔老虎機中Jackpot,無錯, 柒柒柒 係老虎機中Jackpot會出現嘅數字,但拉中老虎機係唔係lucky嘅事,就真係見人見智。

天下大亂,就由 柒柒柒 開始,花生快絕種。

發表迴響

你的電子郵件位址並不會被公開。 必要欄位標記為 *